Uber 3300 əməkdaşı ixtisar edəcək, uzaqdan işi dayandıracaq

    “Uber” qlobal işçi qüvvəsinin təxminən 10 faizini əhatə edən ixtisar planını açıqlayıb. Şirkət təxminən 3300 əməkdaşını ixtisar edəcək. Dəyişiklik idarəetmə pillələrini azaltmaq və sərnişindaşıma, çatdırılma, robotaksi istiqamətlərinə daha çox sərmayə yönəltmək məqsədi daşıyır. Planı baş direktor Dara Khosrowshahi çərşənbə günü əməkdaşlara göndərilən daxili məktubda təqdim edib.

    Yenidən strukturlaşma çərçivəsində menecerlərin sayı 20 faiz azalacaq. Bu vəzifələrdə çalışan bəzi əməkdaşlar rəhbər statusu olmadan mütəxəssis kimi fəaliyyətlərini davam etdirəcəklər. Şirkət bir və ya iki nəfərdən ibarət komandaların sayını da 50 faiz azaldacaq. İxtisarlar CEO ilə aralarında yeddidən çox idarəetmə pilləsi olan əməkdaşları da əhatə edəcək.

    “Uber” mühəndislik, elmi araşdırmalar və çatdırılma bölmələrini vahid strukturda birləşdirəcək. Restoran, pərakəndə satış və birbaşa çatdırılma üzrə əməliyyatlar da eyni rəhbərlik altında toplanacaq. Şirkət bu addımlarla parçalanmış məsuliyyət sahələrini azaltmağı və bölmələr arasındakı koordinasiyanı sadələşdirməyi planlaşdırır. Dəyişikliklər əsas biznes istiqamətlərinə daha çox resurs ayırmağa imkan verəcək.

    “Uber” uzaqdan iş imkanlarını da demək olar ki, tam dayandıracaq. Yeni qaydalardan sonra əməkdaşların 1 faizindən də az hissəsinə məsafədən işləməyə icazə veriləcək. Dara Khosrowshahi şirkətin böyüdükcə yeni məhsullara və biznes sahələrinə keçdiyini, lakin bunun idarəetməni mürəkkəbləşdirdiyini bildirib. Onun sözlərinə görə, artan idarəetmə pillələri, koordinasiya ehtiyacı və parçalanmış məsuliyyət indiki miqyasda səmərəli deyil.