Ulduzlararası 3I/ATLAS obyekti iyul ayında kəşf olunduğu gündən bəri diqqət mərkəzinə çevrilib. Bunun əsas səbəbi onun təbiətinin hələ də tam olaraq müəyyən edilməməsidir. NASA tərəfindən yeni yayımlanan 3I/ATLAS görüntüləri isə obyektin mənşəyi ilə bağlı əlavə suallar yaradıb.

 Sözügedən görüntülər müxtəlif kosmik aparatların – James Webb Kosmik Teleskopu, Mars Reconnaissance Orbiteri, Perseverance Mars roveri və Lucy asteroid tədqiqat zondu vasitəsilə çəkilib.

 Aparılan araşdırmalara görə, NASA rəsmiləri ulduzlararası 3I/ATLAS obyektinin “əslində təbiətcə kometa olduğunu” təsdiqləyiblər. Bu isə onun “yadplanetli kosmik gəmi” olması ilə bağlı yayılan fərziyyələrə ziddir. NASA-nın Assosiasiya Administratoru Amit Kshatriya bildirib:

 “Bu obyekt görünüşü və davranışı ilə kometaya bənzəyir və bütün sübutlar onun kometa olduğunu göstərir. Lakin onun Günəş sisteminin xaricindən gəlməsi onu olduqca maraqlı, həyəcanverici və elmi cəhətdən əhəmiyyətli edir.”

 NASA-nın Elm Missiyaları Direktorluğunun assosiasiya administratoru Nikki Fox isə brifinq zamanı 3I/ATLAS-ın “yadplanetli zond” olması ehtimalını qəti şəkildə təkzib edib. Yayımlanan görüntülərdə 3I/ATLAS kometası bulanıq bir top şəklində görünür. Bu görünüşü yaradan komа adlı buz və toz buludu Günəşə yaxınlaşdıqca kometanın səthindən qopan hissəciklərdən formalaşır. NASA rəsmiləri həmçinin ulduzlararası obyektlərin nümayiş etdirdiyi bəzi anomaliyaların hələlik izah olunmadığını etiraf ediblər.