Intel prosessorlarının adlarının dəyişəcəyinə dair ilk sübut “Ashes of Singularity” adlı oyunda Core Ultra 5 1003H prosessorunun adının əks olunması olmuşdu. Intel şirkətinin kommunikasiyalar üzrə direktoru olan Bernard Fernandes bu mövzu ilə bağlı rəsmi məlumat verib. Fernandes bildirib ki, şirkət 14-cü nəsil Intel Meteor Lake prosessorlarının təqdim olunmalarına az müddət qalmış öz brendinin adına bəzi dəyişiklikləri əlavə etməyə başlayıb.

    Bununla belə yeni prosessorların adlarının Core Ultra 5 1003H adına bənzər olub-olmayacağı qeyd edilməyib. Fernandes bu mövzu ətrafında yaxın həftələrdə daha ətraflı məlumatların təqdim ediləcəyini bildirib. Prosessorların adlarında Ultra sözünün olması Apple şirkətinin Mac kompüterləri üçün olan prosessorlarının necə adlandırmasına bənzəyir. Belə ki, Apple öz portfoliosunda artıq M1 Ultra adlı prosessora sahibdir. Əgər Intel öz prosessorlarını da bu cür adlandırsa deməli yeni prosessorlar Core, Core Pro, Core Max və Core Ultra kimi modellərə bölünəcəklər. Nəticədə isə Intel Core i brendi 15 illik tarixini yekunlaşdıracaq.