ABŞ-ın raketdən müdafiə sistemi "Qızıl Qübbə"nin testlərini 2028-ci ildə keçirə bilər

     Prezidentlik müddətinin əvvəlində Donald Trump ballistik raketləri ABŞ hava məkanına daxil olmadan öncə məhv edə biləcək "Qızıl Qübbə" adlı raketdən müdafiə sistemi (RMS) yaratmaq niyyətində olduğunu bəyan etmişdi. Hələlik ABŞ hakimiyyətinin bu ideyanı konkret olaraq necə həyata keçirəcəyi məlum deyil, lakin rəsmi sənədlərdə və açıqlamalarda birbaşa şəkildə kosmosun adı çəkilir. Görünən odur ki, raketlərin izlənməsi və ya məhv edilməsi vasitələri məhz orada yerləşdiriləcək. CNN öz mənbələrinə istinadən yazır ki, "Qızıl Qübbə" sisteminin ilk genişmiqyaslı sınağı 2028-ci ilə - prezident seçkilərindən dərhal öncəyə - planlaşdırılıb. Bu tarixlər Trump-ın daha əvvəl səsləndirdiyi, 3 il ərzində yeni raketdən müdafiə sistemi hazırlamaq planları ilə üst-üstə düşür.

     Nəşrin məlumatına görə, sınaqlar FTI-X - “kompleks uçuş sınaqları” adı ilə keçiriləcək. Bu sınaqlar zamanı “Qızıl Qübbə” sisteminə daxil olan müxtəlif sensorlar və silah sistemləri birgə işləyərək bir neçə hədəfi vurmağa cəhd edəcək. Bildirilir ki, Pentaqon bu proqramı sürətləndirmək və Donald Trump tərəfindən müəyyən edilmiş vaxt çərçivəsinə riayət etmək üçün bütün imkanlarını səfərbər etmək niyyətindədir. Nəşrin mənbəsi olan Pentaqon nümayəndəsi qeyd edib ki, 3 illik müddət çox iddialıdır, xüsusilə son onilliklər ərzində raketlərin kosmosdan məhv edilməsi imkanlarının araşdırıldığını nəzərə alsaq.

     Söhbət, çox mürəkkəb və texniki baxımdan son dərəcə riskli bir vəzifədən gedir, çünki bütün ABŞ ərazisini əhatə etmək üçün çox sayda peykə ehtiyac olacaq. CNN xatırladır ki, “Qızıl Qübbə” proqramının rəhbəri general Michael Guetlein kosmik raketdən müdafiə sisteminin həyata keçirilməsindəki çətinlikləri özü də etiraf etmişdi. Onun fikrincə, əsl texniki problem kosmosda yerləşəcək bir məhvetmə aparatının yaradılması olacaq. Amerikalı general həmin vaxt bildirmişdi ki, bu cür texnologiyaların mövcudluğuna və Pentaqonun onların fiziki işləkliyini sübut edə biləcəyinə inanır. Lakin burada əsas sual iqtisadi səmərəlilik və miqyaslandırma ilə bağlıdır - yəni ölkənin sənaye bazası raket təhdidlərini kosmosdan izləmək üçün yetərincə peyk istehsal edə biləcəkmi?