Adətən dərmanlara qarşı bədənin reaksiyası nəticəsində yaranan, dəri və selikli qişaları zədələyən və ağır səpgilərə səbəb olan layella sindromu çox ciddi nəticələrə gətirib çıxara bilər və bu nadir xəstəlik ölümə səbəb ola bilər. Almaniyadakı Max Planck İnstitutunun rəhbərliyi ilə aparılan tədqiqatda bu nadir xəstəlikdən və ya onun daha yüngül forması olan Stevens-Johnson sindromundan əziyyət çəkən 7 xəstə müalicə edilib. Müalicə olunan xəstələrin heç birində yan təsirlər müşahidə edilməyib.

     Bu xəstəlik hər il dünya üzrə 1-2 milyon arasında insana təsir edir. Yeni müalicə üsulu immun sisteminin həddindən artıq reaksiyasını boğan JAK inhibitor-ları adlanan dərmanlardan istifadəyə əsaslanır. Xərçəng müalicəsi zamanı bu xəstəliyə tutulan və dərisinin üçdə birini itirən bir xəstə də 16 gün ərzində tam sağalıb. Bu xəstənin ölüm riski 60% olaraq qiymətləndirilib.

     Tədqiqatçılar müəyyən ediblər ki, xəstəliyin əsas səbəbi olan JAK/STAT adlı immun yolunun boğulması dəriyə təsir edən iltihab və zədələnmənin qarşısını ala bilər. Walter və Eliza Hall Tibb Araşdırma İnstitutundan Holly Anderton bu işlə bağlı açıqlamasında bildirib: “Bu müalicə ilə xəstəliyin gedişatını sürətlə dayandıra bilmək, xəstələrin müalicəsində böyük bir fərq yaradacaq”.