Zepp Health şirkətinə məxsus olan və smart saatların istehsalı sahəsində fəaliyyət göstərən Amazfit brendi ZeppOS adlı əməliyyat sisteminin yeni versiyasını təqdim etdiyini elan edib. Əməliyyat sisteminin istifadəyə verilmiş yeni versiyasında reallaşdırılmış əsas yenilik ondan ibarətdir ki, ona OpenAI şirkətinin süni zəka əsaslı ChatGPT çat-botu inteqrasiya edilib. Beləliklə ZeppOS üzərindən çat-bot ilə qarşılıqlı əlaqədə olmaq üçün ayrıca siferblatdan istifadə edilir. Həmin siferblatda istifadəçi ChatGPT ilə ünsiyyət qura bilər.

    ZeppOS-ə inteqrasiya edlmiş çat-bot istifadəçinin suallarına cavab verir və onun əmrləri əsasında müəyyən əməliyyatları yerinə yetirir. Məsələn, istifadəçi çat-bota “How was my day?” sualını verən zaman çat-bot gün ərzində əldə edilmiş məlumatların qısa xülasəsini təqdim edir. İstifadəçi eyni üsul ilə çat-botdan hava proqnozu, avtomobil yollarındakı tıxaclar, müxtəlif şəhərlərdəki saat və təqvimlər barəsində məlumatlar əldə edə və ya internetdən hansısa digər məlumatları öyrənə bilər. Qeyd etmək lazımdır ki, hal hazırda heç bir şirkət belə bir imkanı təklif etmir. Yəni başqa sözlə desək, bu məsələdə Amazfit bir ilk oldu. Lakin çox güman ki, yaxın zamanda digər şirkətlər də öz smart saatlarında və digər cihazlarında bu imkanın analoqunu təqdim edəcəklər.