Apple A17 Pro prosessoru Geekbench testlərindən keçib

    Yenicə təqdim edilmiş iPhone 15 smartfon seriyasına daxil olan iPhone 15 Pro və iPhone 15 Pro Max modellərinin əsas fərqləndirici özəllikləri ondan ibarətdir ki, onlar A17 Pro adlı prosessor vasitəsilə çalışırlar. Sözügedən prosessor mobil bazarın ilk 3 nanometrlik prosessorudur. Apple özü A17 Pro barəsində ətraflı məlumat verməsə də, Geekbench bençmarkı onun imkanlarını sərgiləyib. Belə ki, A17 Pro prosessoru Geekbench testlərindən keçib.

    Beləliklə məlum olub ki., A17 Pro-nun tərkibinə 6 nüvəli CPU daxil olub. Nüvələrdən ikisi yüksək performanslı, dördü isə enerji effektivliyi nüvələridir. Bununla belə yüksək performanslı nüvələr 3.78 GHz çalışma tezliyinə sahibdirlər. A17 Pro Geekbench-in bir nüvəli testi çərçivəsində 2908 xal, çox nüvəli testi çərçivəsində isə 7238 xal toplayıb. Nəticədə A16 Bionic prosessoru ilə müqayisədə A17 Pro-nun bir nüvəli performans göstəricisi 10%, çox nüvəli performans göstəricisi isə 4% yüksəlib. A17 Pro hətta son flaqman Android smartfonlardakı prosessorları belə üstələyir.