Apple gizli şəkildə özünün MicroLED adlı ekranını yaratmağa başlayıb

    Apple şirkəti iPhone X ekranının bir sıra göstəricilərindən daha üstün olacaq MicroLED adlı ekranı üzərində gizli şəkildə çalışır. Bu barədə Bloomberg saytı xəbər verib. Məlumata əsasən şirkət yeni nəsil MicroLED ekranlarının istehsalına külli miqdarda vəsait yatırır. Güman olunur ki, həmin ekranlar indiki OLED ekranlardan daha nazik və daha dolğun rəngli olacaqlar.

    Bundan əlavə olaraq yeni MicroLED ekranlar az enerji sərfiyyatı özəlliyinə, geniş rəng qammasına və ayrı rənglər üzərində dəqiq idarəetmə özəlliklərinə sahib olacaqlar. MicroLED Apple şirkəti tərəfindən öz cihazları üçün istehsal edilən ilk ekran ola bilər. Qeyd etmək lazımdır ki, daha öncə şirkət öz məhsullarında yalnız kənar şirkətlərin istehsalı olmuş ekranlardan istifadə edib. Məsələn iPhone X-in ekranları Samsung tərəfindən, Apple Watch-un ekranları isə LG tərəfindən istehsal olunur.

    Bununla yanaşı məlumata əsasən MicroLED ekranlı ilk Apple cihazı yalnız bir neçə ildən sonra satışa çıxa bilər. Belə ki, MicroLED-in istehsalı adi OLED ekranın istehsalından daha qəlizdir. Bloomberg-in verdiyi məlumata əsasən yeni ekran üzərində 300-ə yaxın mühəndis çalışır. Ekran istehsalı üçün bu cür göstəricinin az olması baxımından şirkət çox gümanki ekran istehsalını autsorsinq edəcək. Apple şirkəti həmişəki kimi bu xəbər ilə bağlı heç bir rəy bildirməyib.