Apple investorları Vision Pro-dan razı qalıblar

    Apple Vision Pro-nun təqdimatından öncə o, investorları o qədər də maraqlandırmırdı. Belə ki, investorların əksəriyyəti şirkətin süni zəka sahəsinə diqqət ayırmasını istəyirdi. Lakin təqdimatdan sonra investorlar öz fikirlərini dəyişiblər. Onlar Vision Pro-dan tamamilə razı qalıblar. Məsələn Wedbush adlı investisiya bankı şirkətin səhmlərinin hədəf qiymətini 15$ yüksəldib. Hal hazırda şirkət öz bazar dəyərini yüksəltməyə davam edir və ola bilsin ki, yaxın gələcəkdə 3 trilyon dollar bazar dəyərinə sahib ilk şirkət olsun.

    Vision Pro-nun yüksək satış qiymətinə sahib olmasına və gələn ilin əvvəlində ilkin mərhələ üzrə yalnız ABŞ bazarında satışa çıxacağına baxmayaraq investorlar düşünürlər ki, Apple bu bazarda inkişaf etmək üçün daha dərin planlara sahibdir. Onların fikirlərinə əsasən digər şirkətlərin dama oynadıqları bir vaxtda Apple şahmat oynamaqla məşğuldur. “Biz hələ də əminik ki, bu, Apple şirkətinin öz istifadəçi kütləsi üçün süni zəka əsaslı tətbiqlərə istiqamətlənmiş generativ ekosistemin yaradılması üzrə geniş strategiyasının ilk addımıdır” - deyə investorlar qeyd ediblər. Bununla belə analitiklər indiki mərhələdə Vision Pro-nu kütləvi şəkildə istifadə üçün nəzərdə tutulmuş bir məhsul hesab etmirlər. Bunun səbəblərindən biri isə onun olduqca yüksək satış qiymətinə sahib olmasıdır.