main-post-cover

    Apple M analoqu?: Samsung smartfonlar və noutbuklar üçün nəzərdə tutulmuş yeni növ prosessor hazırlayır

    Elm & Texnologiya
    07.03.2023
    Emil Nəcəfov
        Samsung artıq özünün Exynos adlı prosessor seriyasına sahibdir. Fevral ayının əvvəlində təqdim edilmiş Galaxy S23 smartfon seryiasına daxil olan bütün modellərin Snapdragon 8 Gen 2 prosessoru ilə təchiz olunmalarına baxmayaraq şirkət hələ də Exynos prosessor seriyasını inkişaf etdirir. İnsayderlərin vermiş olduqları yeni məlumata əsasən Samsung yeni növ prosessorların hazırlanmasına start verib. Gözləntilərə əsasən yeni növ prosessorlar smartfonlar və noutbuklar üçün nəzərdə tutulacaq. Məlumatda qeyd edilib ki, Samsung işlək adı Galaxy Chip olan prosessorun nüvəsini hazırlayacaq komandaya artıq sahibdir.
        Galaxy Chip-in Exynos-dan əsas fərqi ondan ibarət olacaq ki, yeni prosessorda hazır ARM nüvələri əvəzinə tamamilə sıfırdan yığılmış nüvələr istifadə ediləcək. Bundan əlavə olaraq məlumata əsasən Samsung-un Galaxy Chip layihəsinə AMD şirkətinin keçmiş nüfuzlu əməkdaşı rəhbərlik edir. İnsayderlər bildiriblər ki, Samsung-un öz fərdi nüvələri üzərində çalışmasına baxmayaraq Galaxy Chip-in ilk versiyaları ARM arxitekturası əsasında hazırlanacaqlar. Gözləntilərə əsasən bu cür hibrid prosessor 2025-ci ildə təqdim ediləcək. 2027-ci ildə isə şirkət tamamilə fərdi nüvələrdən ibarət Galaxy Chip-i təqdim edəcək. Galaxy Chip-i əldə edəcək ilk cihazlar barəsində məlumat yoxdur. Lakin gözləntilərə əsasən o, şirkətin smartfonlarında və noutbuklarında istifadə ediləcək.
    Linki kopyala