5 iyun tarixində Apple şirkətinin WWDC 2023 konfransı start götürəcək. Lakin verilmiş məlumata əsasən şirkət həmin tarix üçün WWDC 2023 çərçivəsində xüsusi tədbirin keçirilməsini planlaşdırır. Xüsusi tədbir Apple Park-da baş tutmalıdır. İnsayderlərin verdikləri məlumata əsasən planlaşdırılan xüsusi tədbir zamanı Apple öz ilk qarışıq reallıq (AR + VR / Mixed Reality) cihazını təqdim edə bilər.

    Apple sözügedən xüsusi tədbir barəsində məlumatı WWDC 2023-ün veb səhifəsində yerləşdirib. Tədbir çərçivəsində nəyin təqdim olunacağı barəsində şirkət heç bir məlumat verməyib. Lakin qeyd edilib ki, xüsusi tədbir bütün günü əhatə edəcək. Tədbir zamanı Apple mühəndisləri və tərtibatçıları ilə görüşlərin olacağı gözlənilir. Bəzi məlumatlara əsasən Apple tədbir zamanı qarışıq reallıq cihazı üçün nəzərdə tutulmuş xrOS adlı yeni əməliyyat sistemi və cihazın özü barəsində məlumat verə bilər.