Apple Vision Pro-nun batareya həcmi barəsində yeni məlumat ortaya çıxıb

    Vision Pro-nun təqdimatı zamanı Apple şirkəti ənənəyə sadiq qalaraq cihazın texniki göstəricilərinə deyil, onun praktiki imkanlarına diqqət ayırdı. Lakin insayderlərin sayəsində Vision Pro-nun texniki göstəriciləri barəsində maraqlı məlumatlar ortaya çıxır. Bir neçə gün bundan öncə onlar Vision Pro-nun batareyası barəsində məlumat vermişdilər. Verilmiş məlumatda qeyd edilmişdi ki, qarışıq reallıq cihazı təqribi olaraq 6500 mAh enerji tutumlu batareya ilə təchiz olunub.

    Lakin verilmiş yeni məlumat cihazın daha az enerji tutumlu batareyaya sahib olduğunu ortaya çıxarıb. İnsayderlər tərəfindən təqdim edilmiş yeni fotolarda Vision Pro-nun batareyalarının əks olunduğu iddia edilir. Batareyaların üzərindəki yazılardan belə qənaətə gəlmək olar ki, onlar 4780 mAh həcmindədirlər. Nəzərə alsaq, Vision Pro iki ədəd yüksək keyfiyyətli ekrana və çoxlu sayda kamera ilə müxtəlif sensora sahibdir, görünür, onlar bu cür batareyada olan enerjinin böyük hissəsini sərf edən faktorlardır. Nəticədə Vision Pro yalnız 2 saat ərzində çalışa bilir.