Apple Vision Pro-nun sadələşdirilmiş versiyası ləğv edilmiş ola bilər

    Apple şirkətinin Vision Pro adlı qarışıq reallıq (AR + VR / Mixed Reality) cihazının təqdimatından sonra bu cihazın daha sadələşdirilmiş versiyasının hazırlanması ilə bağlı çoxlu sayda məlumat ortaya çıxdı. Görünür, şirkət bu mövzuda planlarını dəyişib və Vision Pro-nun sadələşdirilmiş versiyasını gözləmək artıq lazım deyil. Bu barədə məlumatı məşhur analitik Ming-Chi Kuo təqdim edib. Vision Pro-nun sadələşdirilmiş versiyasının mümkün ləğvi səbəbini analitik təqdim etməyib.

    O sadəcə qeyd edib ki, Apple öz xərclərini azaltmasa, 2025-ci ildə Vision Pro-nun böyük həcmdə istehsalını gözləmək lazım deyil. Bununla yanaşı analitikin fikrincə Apple şirkəti gələn il ümumilikdə 400 000-600 000 ədəd Vision Pro istehsal edəcək. Son məlumat sızıntılarına əsasən Apple şirkəti Vision Pro-nun sadələşdirilmiş versiyasını 2025-ci ildə təqdim etməyi planlaşdırırdı. Cihazın daha sadə ekranları və daha aşağı performanslı prosessoru əldə edəcəyi güman edilirdi.