Apple Vision Pro Samsung-un genişləndirilmiş reallıq cihazı planlarını alt-üst edib

    Keçən ayın əvvəlində baş tutmuş WWDC 2023 konfransı çərçivəsində Apple şirkəti Vision Pro adlı qarışıq reallıq (AR + VR / Mixed Reality) cihazını təqdim etmişdi. Şirkətin ilk MR cihazı gələn ilin əvvəlində 3500$-a satışa çıxacaq. İstifadəçilərin bu cihaz ətrafında mübahisə etdikləri bir vaxtda kütləvi informasiya vasitələrinin verdikləri məlumata əsasən Vision Pro Samsung şirkətinin bütün planlarını alt-üst edib. Məlumatda qeyd edilib ki, Samsung hal hazırda genişləndirilmiş reallıq (Extendent Reality / XR) cihazı üzərində çalışır.

    Şirkət onun kütləvi istehsalına 2024-cü ilin əvvəlində start verməyi planlaşdırırdı. Lakin Apple şirkətinin Vision Pro-nu təqdim etməsi Samsung-un öz planlarını dəyişməsinə səbəb olub. Məlumata əsasən Samsung XR cihazını yarım il təxirə salıb və onun ümumi konseptinə, dizaynına və əsas texniki imkanlarına yenidən nəzər yetirməyi qərara alıb. Samsung-un XR cihazı barəsində məlumat çox azdır. Məlumdur ki, cihaz üçün ekranlar Samsung Display və BOE şirkətləri tərəfindən istehsal ediləcək. Cihaz barəsində daha çox məlumat çox güman ki, gələn il ortaya çıxacaq.