"Apple"dan yeni Beats Qulaqcıqları

"Apple”ın 7 Sentyabr tarixində keçirəcəyi mərasimdə iPhone 7 modeli rəsmi olaraq təqdim ediləcək. Apple təqdimat mərasimində, iPhone 7-dən əlavə olaraq yeni Beats Qulaqcıqlarını da təqdim edə bilər!

"Technote.az” olaraq sizə, "Apple”ın 7 Sentyabr 2016-cı ildə reallaşdıracağı mərasimdə bir çox yeni məhsulunun təqdimatını edəcəyini xəbər vermişdik. Mənbələrimizdən aldığımız yeni məlumatlara əsasən deyə bilərik ki, təqdimat zamanı düşündüyümüzdən daha çox yeni məhsul ilə qarşılaşa bilərik.

Bunlardan biri də "Dre Products” məhsulu olan yeni Beats qulaqcıqlardır.

Beats PR Komandası tərəfindən səhvən göndərilən bir e-poçt, bu mövzuda iddiaların gündəmə gəlməsinə səbəb oldu.

Beats PR komandasının mesajında: İstifadəçilərin 7 Sentyabr 2016-da reallaşacaq "Apple Təqdimat Mərasimini” qaçırmamalı olduqlarını, çünki bu tarixdə "Dre Products” istehsalı yeni Beats qulaqcıqlarının da təqdim ediləcəyi bildirilirdi.

Mütəxəssislərin fikrincə isə "Apple”ın mövzu ilə bağlı rəsmi bir açıqlama etməməsi səbəbindən, mövzu ilə bağlı yayılan xəbərlər tam olaraq əsaslı sayılmır.

Bəzi analitiklər isə yeni nəsil iPhone cihazlarına özəl olaraq hazırlanmış Beats qulaqcıqlarının, özləri baxımından sürpriz olmadığını, bunu əvvəlcədən təxmin etdiklərini bildirirlər.

"Apple”ın gələn həftə keçirəcəyi mərasimdə iPhone 7, Beats qulaqcıqlarına əlavə olaraq Apple Watch 2 məhsulunu da təqdim etməsi gözlənilir.