ASUS ofis işləri üçün nəzərdə tutulmuş yeni monitorunu təqdim edib - QİYMƏTİ

    ASUS şirkəti ofis işləri üçün nəzərdə tutulmuş yeni monitorunu təqdim edib. Yeni monitor ASUS VA27ACFSN Docking Monitor adını əldə edib. Beləliklə sözügedən yeni monitor 100 Hz-lik təsvir yenilənməsinə sahib 2560x1440 piksel keyfiyyətli 27 düym IPS ekranla təchiz olunub. Ekranın maksimal parlaqlıq səviyyəsi 350 nit təşkil edir və sRGB rəng diapazonunun 99%-ni əhatə edir. Monitorun gövdəsi özündə iki ədəd səsgücləndiricini birləşdirir və onlardan hər biri 2 vatt gücündədir.

    Monitorun gövdəsinə yerləşdirilmiş USB hub-a 3 ədəd USB 3.2 Type-A girişi və 2 ədəd Type-C girişi yerləşdirilib. USB Type-C girişlərindən biri DisplayPort dəstəyinə, digəri isə 90 vatt gücündə enerji ötürmə imkanına sahibdir. ASUS VA27ACFSN Docking Monitor üstəlik DisplayPort 1.2, HDMI 2.0 girişlərinə, naqilli qulaqlıqlar üçün 3.5 mm-lik audiogirişə və Ethernet girişinə sahibdir. Monitor artıq 363 avro qiymətində satışa çıxıb.