Fotoaparatlar və foto optika sahəsində fəaliyyət göstərən müxtəlif şirkətlər smartfon istehsalçıları ilə əməkdaşlıq edirlər. Bu cür əməkdaşlıqlar çərçivəsində smartfon istehsalçıları həmin şirkətlərin kamera və optika texnologiyalarını öz məhsullarına inteqrasiya edirlər. Bu cür şirkətlərə misal olaraq Zeiss, Leica və Hasselblad-ı gətirmək olar. Digital Chat Station ləqəbli məşhur insayderin sözlərinə əsasən smartfon istehsalçıları ilə bu cür əməkdaşlığa daha bir şirkət qoşula bilər. Söhbət, Canon-dan gedir.

    İnsayderin sözlərinə əsasən Canon hal hazırda əməkdaşlıq edə biləcəyi uyğun smartfon istehsalçısı axtarışındadır. Bu üsul ilə şirkət öz kamera və optika texnologiyalarını smartfonlara inteqrasiya etmək istəyir. Buna görə də yaxın gələcəkdə Canon hansısa məşhur smartfon brendi ilə əməkdaşlıq edə bilər. Məsələn hal hazırda Leica ilə Xiaomi, Hasselblad ilə OPPO və OnePlus, Zeiss ilə isə vivo əməkdaşlıq edirlər. Məlumata əsasən Apple, Samsung və Sony şirkətləri öz kamera brendlərinə diqqət ayırdıqları üçün çətin ki, onlar Canon ilə əməıkdaşlıq etsinlər. Buna görə də potensial partnyorlar siyahısında Huawei, Honor, ASUS, Motorola və realme brendləri qalırlar.