Heç kim üçün sirr deyil ki, Çində texnologiyalar yüksək sürətlə inkişaf edirlər. Çin Milli Statistika Bürosunun yeni hesabatına əsasən bunun səbəblərindən biri tədqiqat və inkişaf işlərinə yatırılan külli miqdarda investisiyalar ola bilər. Statistikada qeyd edilib ki, 2022-ci ildə Çin hökumətinin tədqiqat və inkişaf işlərinə olmuş xərcləri ümumilikdə 418.2 milyard dollar təşkil edib. Bu isə 2021-ci ildəki göstəricidən 10.1% daha yüksəkdir. 2020-ci il ilə müqayisədə 2021-ci ildə bu göstərici 7.7% yüksəlmişdi.

    Bununla belə ölkə rəhbərliyi tərəfindən 14-cü 5 illik (2021-2025) plan yerinə yetirilir. Bu plana əsasən dövlətin tədqiqat və inkişaf sahəsinə investisiyaları hər il 7% yüksəlməlidir. Məlumata əsasən Çinin keçən il tədqiqat və inkişaf sahəsinə ümumi xərci ölkənin ümumi daxili məhsulunun 2.54%-ni təşkil edib. Bu isə 2021-ci ildəki göstəricidən 0.11% yüksəkdir. Eyni zamanda ölkənin ümumi investisiya vəsaitlərinin 84%-i yerli şirkətlərə təqdim edilib. Bu isə 2021-ci ildə dövlət tərəfindən yerli şirkətlərə ayrılmış vəsaitdən 4.6% daha çoxdur.