Geekerwan ləqəbli çinli texnoblogger Huawei Mate 60 smartfonlarında istifadə edilən Kirin 9000s prosessorunu analiz edərək onun strukturu barəsində məlumat verib. Qeyd etmək lazımdır ki, bir neçə müddət bundan öncə Kirin 9000s prosessoru AnTuTu testlərindən keçən zaman qeyd edilmişdi ki, o, 12 nüvəyə sahibdir. Lakin texnoblogger bildirib ki, prosessor əslində 12 nüvəyə deyil, 8 nüvəyə sahibdir. Məlumatda qeyd edilib ki, sözügedən prosessorda nüvələr "1 + 3 + 4" sxemi üzrə yerləşirlər.

    Bununla belə bu sxemdəki ilk iki klaster Huawei şirkətinin Taishan adlı fərdi nüvələrini, üçüncü klaster isə ənənəvi Cortex-A510 nüvələrini əhatə edir. Prosessorun əsas böyük nüvəsi 2.62 GHz tezlikdə çalışır və onun performans səviyyəsi Cortex-A710 ilə Cortex-X1 nüvələrinin arasında yerləşir. İkinci klasterə daxil olan nüvələr 2.15 GHz tezlikdə çalışırlar və onlar Snapdragon 8 Gen 1-də istifadə edilən Cortex-A710 nüvəsindən geridə qalırlar.

    Kirin 9000s-in ümumi performans səviyyəsi Snapdragon 888-in performans səviyyəsi ilə eynidir. Kirin 9000s Geekbench 5 bençmarkının bir nüvəli testi çərçivəsində 1005 xal, çox nüvəli testi çərçivəsində isə 4019 xal toplayır. Enerji effektivliyi baxımından bu yeni prosessor Snapdragon 888 ilə Snapdragon 865-in arasında yerləşir. Prosessorun Maleoon-910 adlı qrafik çipi 750 MHz tezlikdə çalışır və özündə 4 ədəd nüvəni birləşdirir. Performans və enerji sərfiyyatı baxımından sözügedən qrafik çip Adreno 660 səviyyəsindədir.