Cloudflare və texnologiya nəhəngləri internetdə bot probleminə yeni həll hazırlayır

    Cloudflare, Google Chrome, Mozilla Firefox, Microsoft Edge və Shopify internetdə bot probleminə qarşı yeni həll hazırlamaq üçün bir araya gəlib. Şirkətlər istifadəçilərin məxfiliyini qoruyan və CAPTCHA-lara ehtiyacı azaltmağı hədəfləyən PACT (Private Access Control Tokens) adlı yeni internet protokolu üzərində işləyirlər.

    Şirkətlərin bildirdiyinə görə, PACT veb-saytlara istifadəçinin insan və ya səlahiyyətli avtomatlaşdırılmış agent olduğunu təsdiqləməyə imkan verəcək. Bunun üçün istifadəçilərdən hesab yaratmaq, əlavə giriş etmək və ya CAPTCHA testlərini keçmək tələb olunmayacaq. Əvəzində brauzerlərdə saxlanılan anonim tokenlər vasitəsilə istifadəçinin etibarlı olduğu təsdiqlənəcək.

    Bu təşəbbüsün ortaya çıxmasının əsas səbəblərindən biri internetdə bot trafikinin insan trafikini geridə qoymasıdır. Cloudflare Radar məlumatlarına görə, hazırda dünya üzrə veb-saytlara göndərilən HTTP sorğularının təxminən 58%-i avtomatlaşdırılmış sistemlərdən, 42%-i isə insanlardan gəlir. Şirkət hesab edir ki, ChatGPT, Gemini və digər süni intellekt əsaslı agentlərin sürətli yayılması bu prosesi daha da sürətləndirib.

    PACT sistemi istifadəçilərin internet fəaliyyəti barədə məlumat toplamadan işləyəcək. Tokenlər fərqli saytlar arasında istifadə olunsa da, onların vasitəsilə istifadəçinin hansı saytlara daxil olduğunu izləmək mümkün olmayacaq. Bu da məxfiliyin qorunmasını prioritet edən yeni yanaşma kimi qiymətləndirilir. PACT texnologiyası Apple-ın artıq istifadə etdiyi Privacy Pass sisteminin üzərində qurulur. Layihə gələcəkdə internet standartına çevrilməsi üçün standartlaşdırma təşkilatlarına təqdim ediləcək. Bununla belə, texnologiyanın geniş istifadəyə verilməsi üçün hələlik konkret tarix açıqlanmayıb.