Elektromobil istehsalçısı 'Fisker' 1 dəqiqəyə şarj olunan inqilabi elektromobil batareyası yaratdı

Şirkət faktiki olaraq elektromobillər üçün yeni inanılmaz imkanlar yaradan bərk cisimli batareya növünün patentini almağa hazırlaşır. Yeni batareyaların sayəsində elektromobillər bir dəfə şarj vasitəsilə 800 km yol qətt edə biləcəklər. Bununla yanaşı ən əsası odur ki, həmin bərk cisimli batareyalar 1 dəqiqə ərzində şarj olunacaqlar. Əgər bütün bunlar həqiqətən də belədirsə, onda Elon Musk-ın “Tesla” şirkəti digər elektromobil istehsalçılarından əlavə olaraq bu barədə də narahatlıq keçirtməlidir.

Hal hazırda “Tesla”nın ən çox yol qətt edən modeli olan S 100D öz litium-ion batareyası sayəsində bir dəfə şarj olunandan sonra təqribi olaraq 540 km yol qətt edir. Adətən isə Tesla modellərinin şarjına yarım saat vaxt sərf olunur. Lakin bir faktı nəzərə almaq lazımdır. Belə ki, “Fisker” şirkətinin bərk cisimli batareyaları yalnız 2023-cü ildə irimiqyaslı istehsalata hazır olacaq.

Bildiyimiz kimi isə dünya yerində durmur. Həmin vaxtda kimi rəqib şirkətlər öz real variantlarını təqdim edə bilərlər. Bərk cisimli batareyalar litium-ion batareyalarından fərqli olaraq daha çox enerji saxlama və tez zamanda şarj olunma özəlliklərinə sahibdirlər. “Fisker” bildirib ki, onun istehsal edəcəyi bərk cisimli batareyalar adi litium-ion batareyalarından fərqli olaraq 2.5 dəfə daha çox enerji tutma həcminə və daha aşağı qiymətə sahib olacaq.