Ən yaxşı Android? | Honor Magic5 Pro almağa dəyərmi?

    Dizayn olaraq "Honor Magic5 Pro" ikonik bir görüntüyə sahibdir. Cihaz 219 qramm çəki və 8.8 mm gövdə qalınlığı ilə ortalama bir flaqman göstəricilərinə sahibdir. Lakin bu gövdədə diqqət çəkən detal sözsüz ki, arxa kamera blokudur. Belə bir bloku ilk dəfədir gördüm, önə doğru çıxan böyük bir ada kimi görünür və sərt çıxış etmir. Hamar, lakin qabaran bir şəkildə arxa qapaq sanki önə çıxarılıb.    

    Bu adanın üzərində 3-lü kamera seti yerləşdirilib. Bu kameralar Süd Yolu qalaktikasının mərkəzində yerləşən qara dəliyin formasından ilhamlanaraq hazırlanıb. Yəni təkrarolunmaz bir arxa kamera quruluşu var. Bu blok daxilində 3 kameradan əlavə TOF sensor və fləş də quraşdırılıb. 

    Gövdənin özü də fərqli hazırlanıb. Həm arxa həm ön ilə yanaşı kənar künclər də kəsik, bükülən bir görüntüyə sahibdir. Bunun sayəsində cihazın önündə sanki arxaya doğru qismən bükülən böyük, tam çərçivəsiz bir ekran yerləşdirilib.

    

    Belə dizaynla ekran-gövdə nisbəti 91% olub. Fantastik rəqəmdir. Öndə olan blokda iki kamera yuvası var. Bunlardan biri TOF sensordur. Yəni bu cihazda 2 ədəd TOF sensor var ki, öndə olan "Face ID" üçündür. Belə deyim, Android cəbhəsində "3D Face ID"ni dəstəkləyən smartfonlardan biridir və çox əla çalışır. Arxa qapaq sıxlaşdırılmış şüşədən hazırlanıb, yaşıl rəngi qətiyyən barmaq izi saxlamır və sürüşmür. İstifadəsi çox rahatdır. Cihazı masa üzərinə qoyanda blok çox böyük olduğu üçün peredokunu qaldırmış 07 kimi dayanır. Kənarlar təmiz alüminiumdur. Stereo səs dəstəyi, iki xarici səs ucaldan, IP68 standartı üzrə suya-toza davamlılıq təbii ki, var. Xüsusilə bəyəndiyim bükülən ekranının çox həssas hazırlanmasıdır. Yəni barmaqlar kənara təsadüfən dəyib, başqa yerlərə keçid etmir. 

    Ekran yenə də flaqmana yaraşandır. Hətta DXOMARK testləri deyir ki, bu smartfon dünyanın ən yaxşı ekranına sahibdir. Niyə belə qeyd edirlər? İzah edim. 6.81 düymlük LTPO tipli OLED bir ekranı var. 2K keyfiyyətinə və 120 Hz-lik təsvir yenilənmə tezliyinə sahibdir. HDR10+ dəstəyi, 10 bit dərinliyində rəng göstərmə, 1300 nit maksimal parlaqlıq səviyyəsi HDR məzmunlarda 1800 nit-ə yüksəlir. Belə və buna yaxın göstəricilər bütün flaqmanlarda var. Amma bu cihazı daha yaxşı edən "PWM dimming" dəyəri olub ki, Honor bu OLED ekrana 2160 Hz verib. Bunun sayəsində ekran xüsusən gecə istifadəsi zamanı gözə LED-lərin dalğalanmasını hiss etdirmir və beyində melatonin hormon ifrazını əngəlləmir. Mavi işıq dalğasını da az göndərir. "TÜV-Rheinland"dan sertifikatı da var. Yəni digər smartfonlara nisbətdə gözləri daha az yorur. Bu texnologiya ilə dünyada bir ilki ediblər və mən bunu innovasiya hesab edirəm. Günəş altında da olduqca parlaq bir görüntü verə bilir. Ümumilikdə ekran barəsində mənfi nəsə demək mümkün deyil.

    12 GB fiziki RAM, 7 GB virtual RAM və microSD kart dəstəyi olmayan 512 GB daxili yaddaşı ilə Honor Magic5 Pro Qualcomm-un flaqman prosessoru olan Snapdragon 8 gen 2 4 nanometr arxitekturalı prosessorla gəlir. Bu setdə Adreno 740 qrafik kartı var ki, işə salmadığı oyun yoxdur. PUBG təbii ki, 90 FPS-lə bu cihazda oynanıla bilir. RAM-lar LPDDR5x standartlıdır, daxili yaddaş UFS 4.0 yaddaş çipi ilə gəlir ki, oxuma və yazması çox sürətlidir. Cihazın özü də sürətli açılır. Geekbench 5, Geekbench 6 və AnTuTu 9 testlərində rəqiblərinə nəzərən yerini və nəticələrini sizinlə bölüşürəm.

    Ümumiyyətlə sintetik test nəticələrində fərq olsa da, istifadə zamanı performansda fərqi demək olar ki, hiss etmək mümkün deyil. Bu mənada da Honor Magic5 Pro-ya mənfi nəsə deyə bilmirəm. Qutudan Google dəstəkli Android 13 ilə çıxır və ən son istifadəçi interfeysi yenilənməsini də alıb. 5G dəstəyi öz yerində. microSD kart girişi yoxdur, 2 SIM kart ilə istifadə etmək olur. Wi-Fi 6, Bluetooth 5.2, NFC var.

    Kameralara gəlin öndən başlayaq. Bu iki kameradan biri TOF sensordur ki, 3D Face ID üçün və kifayət qədər sürətlidir. Digər əsas kamera 12 MP f/2.5 diafraqma dəyərindədir. Bu kameranın foto keyfiyyətini işıqlı, az işıq olan və gecə rejimində test elədim.

    Gündüz fotolarında iPhone 14 Pro Max-ın ön kamerası ilə müqayisədə çox yaxşıdır. Məsələn, günəş arxada olanda görüntüdə ciddi fərq verir.

    Az işıqlı otaqda da test elədim, nəticəni bəyəndim. Portreti də əladır. Sadəcə gecə rejimində Galaxy S23 Ultra-dan geri qalır. Video tərəfində saniyədə 30 kadr sürətlə 4K keyfiyyəti verir. Təəssüflər olsun ki, saniyədə 60 kadr sürətlə 4K keeyfiyyət seçimi yoxdur. Maksimum "4K 30FPS"dir. 1080p 60 FPS ilə iPhone 14 Pro Max ilə müqayisə etdim. Məncə foto tərəfində iPhone-dan öndədir, video tərəfində isə geridə qalır amma TOF sensorun öndə də olması seqmentdə özəlliklə də Android cəbhəsində Honor-u irəli çıxarır.

    Arxada olan 3-lü kamera sistemi 3 olmasına baxmayaraq 4 kameranın işini görür. Çünki ultragenişbucaqlı kamera həm də makro çəkimlərə yarayır.

     Bütün kameraların göstəricilərinin 50 MP olması çox yaxşı olub. iPhone-da olduğu kimi bərabər paylanıb. Diafraqmalar əsas kamerada f/1.6, ultragenişbucaqlı kamerada f/2.0, 3.5 qat optik yaxınlaşdırma zaman telefoto kamerada isə f/3.0-dır. Lenslər isə müvafiq olaraq 13, 23 və 90 mm-dir. Və arxada da bir ədəd TOF sensor daha var. Ümumilikdə cihazda 2 TOF sensor və 4 kamera yer alıb. Əsas kameranın foto keyfiyyəti çox qəşəngdir. Hər 3 kamera ilə fotolar çəkmişəm.

    100 qat rəqəmsal yaxınlaşdırmanı da yoxladım. Makro fotolar çox keyfiyyətlidir. Gecə çəkilişlərinin rəngləri də məni qane etdi.

    

    Əlavə olaraq hərəkətli kadrları tutmaq üçün özəl bir rejim var. Bunun sayəsində ən hərəkətli anlarda belə çox dəqiq fotolar çəkmək olur. Bu xüsusiyyət Honor-da həqiqətən fərq yaradıb.

    Əsas və telefoto kamerada OIS (optik stabilizasiya) dəstəyi var. Təəssüf ki, ultragenişbucaqlı kamerada OIS deyil, EIS (elektron stabilizasiya) istifadə edilir. Video tərəfində 4K 60FPS yenə də əsas və telefoto kamerası üçün verilib. Ultragenişbucaqlı kamerada 4K 30 FPS-dir. Könül istərdi ki, burada da 4K 60 FPS-i görək. DXOMARK-a görə bu cihaz kamera məsələsində top 3-də olan smartfondur. Mənə görə foto keyfiyyəti möhtəşəmdir. Həm portret həm də adi rejimdə rənglər inanılmaz canlıdır amma video tərəfdə tək ilişdiyim məqam ultragenişbucaqlı kamerada 4K 60FPS dəstəyinin olmaması oldu. Hər üçünün 50 MP olması isə ən bəyəndiyim özəllik oldu. 

    Batareya tərəfində 5000 mAh-ın üzərində bir batareya tutumu var. Adətən flaqman cihazlarda 5000 mAh-a qədər batareya görürük amma Honor Magic5 Pro düz 5100 mAh batareya həcminə sahibdir. Hətta Çində bu smartfon yeni karbon silikon batareya texologiyası ilə 5450 mAh batareya həcmi ilə satışa çıxır. İnanılmazdır, 8.8 mm gövdədə bu həcmdə batareya. 66 vatt naqilli, 50 vatt naqilsiz enerji yığma ilə flaqman rəqiblərinə qan uddurur. Testlər zamanı smartfon 15 dəqiqəyə 45%, 30 dəqiqəyə 75% enerji yığdı. Bu göstərici ilə Xiaomi-dən geridə qalsa da, Apple və Samsung-un flaqmanlarını qabaqlayır. Mənim diqqətimi əsas karbon silikon batareya texnologiyası çəkdi. Az ölçü ilə daha çox mAh verə bilirlər. Ümid edirəm bu texnologiya daha yayğın olar və bizim bazara da gələr.

    Yekun olaraq 512 GB daxili yaddaşlı versiya nağd alışda, 2250 manatdır. Bəli, sizə Honor-a görə baha gələ bilər amma nəzərə alın ki, bu cihaz flaqmandır. Çox mənfi fikir deyə bilmədim. Tək mənfi gördüyüm ön kamerada və arxanın ultragenişbucaqlı kamerasında 4K 60 FPS -in olmaması oldu. Çox innovativ yenilikləri özündə birləşdirir. Ekran tərəfində gözə az zərər vurması, batareyada yeni texnologiya, kamerada hərəkətli anları yaxalama və ikonik gövdə dizaynı. Təbii ki, seçim sizindir amma deyə bilərəm ki, Android cəbhəsinin ən yaxşı smartfonlarından biridir.