Flaqman HTC U11+ və büdcəli U11 Life modelləri təqdim olundular (VİDEO)

U11 Life adlı model, U11-in büdcəli versiyasıdır. Beləliklə bu smartfon vasitəsilə şirkət orta seqmentin bir hissəsini özünə götürmək istəyir. Əgər U11 alüminiumdan hazırlanırdısa, U11 Life-ın korpusu plastikdən hazırlanıb. Bununla yanaşı Life versiyasnın da rəngi U11-dəki kimi Sapphire Blue-dur. U11 Life IP67 standartli sudan və tozdan qorunma özəlliyinə və Edge Sense funksiyasına sahibdir. Smartfonda ənənəvi 3.5 mm-lik audiogiriş yoxdur. Buna görə də komplektdə smartfon USB-C qulaqlıqları ilə satışa çıxacaq.

Digər texniki göstəricilərinə gəldikdə isə U11 Life 5.2 inç Super LCD Full HD ekran (Gorilla Glass qoruyucu şüşəli), Snapdragon 630 prosessoru, 3/4 GB RAM, 32/64 GB daxili yaddaş, f/2.0 diafraqmalı və 4K çəkiliş özəllikli 16 MP-lik arxa, 1080p keyfiyyətində çəkiliş özəllikli 16 MP-lik ön kamera və 2600 mAh enerji tutumlu batareya ilə təchiz olunub. Smartfon Android 7.1.1 Nougat əməliyyat sistemi vasitəsilə çalışır. Lakin növbəti il ərzində onun Android 8.0 Oreo-ya kimi yenilənəcəyi gözlənilir. Smartfon bugündən satışa çıxır və Avropa bazarında 379 avro qiymətinə satılacaq.

U11+ modeli adi U11-ə çox bənzəyir. Belə ki, o da eyni çip, kamera, RAM və digər göstəricilərə sahibdir. Lakin U11+ modelinin əsas özəlliyi onun böyük ekrana sahib olmasındadır. Smartfon 2880x1440 piksel keyfiyyətli 6 inç Super LCD ekran ilə təchiz olunub. Ekranın korpusa nisbəti isə 18:9-dur. Yəni o çərçivəsizdir və Gorilla Glass 5 qoruyucu şüşəsi ilə örtülüb.. Bu versiyada barmaq izi skanı smartfonun arxa panelində yerləşdirilib.

Texniki göstəricilərinə görə U11+ 8 nüvəli Snapdragon 835 prosessoru, 3/4 GB RAM, 64/128 GB daxili yaddaş (2 TB-a kimi microSD dəstəkli), f/1.7 diafraqmalı 12 MP-lik UltraPixel kamera, f/2.0 diafraqmalı 8 MP-lik ön kamera və Quick Charge 3.0 özəllikli 3930 mAh enerji tutumlu batareya ilə təchiz olunub. Bu model də Edge Sense texnologiyasına sahibdir və Android 7.1.1 Nougat əməliyyat sistemi vasitəsilə çalışır. U11+ bu ayın sonunda satışa çıxacaq və Avropada 699 avro qiymətinə satılacaq.