Galaxy A50, A30 və A10 smartfonları barəsində məlumatlar ortaya çıxıb

    Samsung şirkəti Galaxy S10 flaqman seriyasından əlavə həmçinin yenilənmiş Galaxy A seriyasının təqdimatına da hazırlaşır. İndi isə internetdə sözügedən smartfon seriyasının 3 cihazı barəsində məlumatlar ortaya çıxıb. Bu barədə Mysmartprice saytı xəbər verib. İlk öncə Galaxy A50 smartfonundan başlayaq. Məlumata əsasən bu smartfon AMOLED matrisalı FHD+ keyfiyyətli 6.4 düym Infinity U ekrana sahib olacaq və barmaq izi skanı tenxologiyası ekrana inteqrasiya ediləcək.

  Əsas texniki göstəricilərə gəldikdə isə Galaxy A50 modeli 8 nüvəli Exynos 9610 prosessoru, 6 GB RAM, 64/128 GB daxili yaddaş həcmi, 25 MP (f/1.7 diafraqmalı) + 5 MP (f/2.2 diafraqmalı) + 8 MP (f/2.4 diafraqmalı) üçlü arxa kamera, 24 MP-lik (f/2.0 diafraqmalı) ön kamera, sürətli enerji yığma özəllikli 4000 mAh enerji tutumlu batareya və USB-C girişi ilə təchiz olunacaq. Smartfon 3 rəngdə satışa çıxacaq: Qara, ağ və göy.

    Galaxy A30 modeli bir qədər sadələşdirilmiş olacaq. Belə ki, Galaxy A30 smartfonu Exynos 7904 prosessoru, 3/4 GB RAM, 32/64 GB daxili yaddaş həcmi, 16 MP + 5 MP ikili arxa kamera, 16 MP-lik ön kamera və adi barmaq izi skanı texnologiyası ilə təchiz olunacaq. Smartfonun digər göstəriciləri Galaxy A50 modelinin göstəriciləri ilə üst-üstə düşürlər.

    Galaxy A10 smartfonu yenilənmiş A seriyasının ən büdcəli modelidir. Yuxarıda qeyd edilmiş iki smartfondan fərqli olaraq Galaxy A10 modeli HD+ keyfiyyətli 6.2 düym Infinity V ekran, Exynos 7884B prosessoru, 3 GB RAM, 13 MP-lik arxa kamera və microUSB girişi ilə təchiz olunacaq. Smartfon barmaq izi skanı tenxologiyasına sahib olmayacaq. Yenilənmiş Galaxy A seriyasının təqdimatı yaz fəslinin əvvəlində baş tutmalıdır.