Samsung şirkəti bu ilin əvvəlində Galaxy S23 smartfon seriyasını təqdim etməmişdən öncə rəsmi şəkildə təsdiqləmişdi ki, Galaxy S23 smartfonları bütün regionlarda Snapdragon 8 Gen 2 prosessoru ilə təchiz olunacaqlar. Nəticədə belə də oldu. Beləliklə şirkət Galaxy S23 smartfonlarında Exynos 2300 prosessorunun istifadəsindən imtina etdi. Lakin verilmiş yeni məlumata əsasən Exynos 2300 prosessoru performans baxımından faktiki olaraq Snapdragon 8 Gen 2 prosessorunun sahib olduğu səviyyəyə yaxın imiş. İnsayderlərin yeni məlumatlarına əsasən Samsung Exynos 2300-ı prosessorun istehsalından öncə ləğv edib.

    Bununla belə Exynos 2300-ın Snapdragon 8 Gen 2 ilə rəqabət apara biləcəyini bildiyi halda Samsung-un hansı səbəbə görə onu ləğv etməsi aydın deyil. Ola bilsin ki, əsas problem prosessorun enerji effektivliyində olub. Qeyd etmək lazımdır ki, gələn ilin əvvəlində təqdim olunacaq Galaxy S24 smartfon seriyasına Exynos prosessorunun geri qayıdacağı barəsində məlumatlar son zamanlarda daha çox ortaya çıxır. Söhbət, Exynos 2400-dan gedir. Son məlumatlara əsasən sözügedən prosessor Galaxy S24 ilə Galaxy S24 Plus-da istifadə ediləcək. Galaxy S24 Ultra-nın isə Snapdragon 8 Gen 3 prosessoru ilə təchiz olunacağı gözlənilir.