Google Pixel Watch 2 smart saatının özəllikləri barəsində məlumatlar ortaya çıxıb

    Keçən ilin oktyabr ayında Google şirkəti Pixel brendi altında ilk smart saatını təqdim etmişdi. Söhbət, Google Pixel Watch-dan gedir. Bu il isə şirkət Pixel Watch 2-ni təqdim etməlidir. Pixel Watch 2-nin təqdimatına hələ uzun müddət olmasına baxmayaraq onun barəsində məlumatlar mütəmadi şəkildə internetdə ortaya çıxırlar. Android Authority saytı öz növbəsində Google-dakı mənbələrindən bu smart saat barəsində yeni məlumatları əldə edib. Beləliklə verilmiş yeni məlumatlara əsasən Pixel Watch 2 daha yeni və effektiv prosessor vasitəsilə çalışacaq.

    Qeyd etmək lazımdır ki, keçən ilki Pixel Watch modeli Exynos 9110 prosessoru vasitəsilə çalışır. Sözügedən prosessor öz növbəsində 2018-ci ildə təqdim olunub və 10 nanometrlik texnoloji proses əsasında hazırlanıb. Yeni məlumata əsasən isə Pixel Watch 2 smart saatı 4 nanometrlik Snapdragon W5 Gen 1 prosessoru vasitəsilə çalışacaq. Əlavə olaraq Google şirkətinin yeni smart saatı özündə 306 mAh enerji tutumlu batareyanı birləşdirməlidir. Məlumatda qeyd edilib ki, Pixel Watch 2 smart saatı 384x384 piksel keyfiyyətli 1.2 düym ekran ilə təchiz olunacaq. Smart saat üçün ekranların istehsalı ilə BOE əvəzinə Samsung Display şirkəti məşğul olacaq.