Google Pixel Watch ağıllı saatı haqqında yeni məlumatlar sızdırılıb

    İnsayderlər Google şirkətinin hazırladığı ağıllı saatlar barəsində yeni məlumatlar paylaşıblar. Beləliklə məlumatlara əsasən şirkətin ağıllı saat modeli Google Pixel Watch adlanacaq. O, Google şirkətinin hazırladığı Wear OS əməliyyat sistemi əsasında çalışacaq. Güman olunur ki, Pixel Watch Qualcomm şirkəti tərəfindən hazırlanan Wear 3100 prosessoru vasitəsilə çalışacaq. Qeyd etmək lazımdır ki, Qualcomm şirkəti sözügedən prosessorları xüsusi olaraq daşına bilən cihazlar üçün hazırlayır.

    Sözügedən ağıllı saatın əsas özəlliklərindən biri də Coach tətbiqi olacaq. Gələcəkdə onun adı Google Fit-ə dəyişilə bilər. Sözügedən tətbiq Google servislərinin məlumat bazalarından istifadə edərək istifadəçi üçün məşqlərin planlarını təşkil edəcək və məşqlərdən sonra istifadəçi üçün sağlam qidanın verildiyi restoranların yerini təqdim edəcək. Pixel Watch-un LTE dəstəyinə sahib olub-olmayacağı barəsində isə heç bir məlumat yoxdur. Çox güman ki, Pixel Watch 4 Oktyabr tarixində Pixel 3 və Pixel 3 XL smartfon modelləri ilə birlikdə təqdim olunacaq.