Bu barədə Reuters saytı xəbər verib. Qadağa barəsində məlumatı isə parlament qarşısında çıxışı zamanı ölkənin maliyyə naziri Arun Jaitley bildirib. Bu qərar Hindistan hökumətinin son 17 ay ərzində hindistanlılar tərəfindən 3.5 milyard dollar həcmində kriptovalyuta tranzaksiyası reallaşdırdıqlarını aşkar etdikdən sonra verilib. Maliyyə naziri Arun Jaitley bildirib ki, ölkə hökuməti kriptovalyutaları qanuni ödəmə üsulu kimi qəbul etmir.

    "Hökümət kriptoaktivlərin qanuni olmayan fəaliyyətlərdə və ödəmələrin aparılmasında istifadəsinin qarşısını almaq üçün bütün üsullardan istifadə edəcək” – deyə maliyyə naziri bildirib. Parlament qarşısında çıxışı zamanı maliyyə naziri həmçinin qeyd edib ki, hökumət blockchain texnologiyasından imtina etmək niyyətində deyil. “Blockchain bizə rəqəmsal iqtisadiyyata sürətli keçid etməyə imkan verəcək” – deyə o qeyd edib. Dekabr ayında Hindistanın vergi xidməti kriptobirjalarda qanunsuz tranzaksiyalar üzrə istintaqa başlamışdı.

    Nəticədə məlum oldu ki, son 17 ay ərzində kriptovalyutalar ilə edilmiş tranzaksiyaların ümumi həcmi 3.5 milyard dollara çatmışdı. Ölkədə kriptovalyutaların aylıq dövriyyəsi 315 milyon dolları keçir və hər ay kriptoticarətdə iştirak edənlərin sayı 200.000 insan artır. Vergi xidməti kriptoinvestorlara məktub göndərib. Həmin məktubda vergi xidməti onlardan öz vəsaitləri, gəlir mənbələri barədə məlumatların verilməsini və əldə olunmuş gəlirlər üzrə vergilərin ödənilməsini tələb edib. Mütəxəssislər isə əmindirlər ki, Hindistanda qəbul olunmuş bu qərar onsuz da son vaxtlar qiymətləri düşən kriptovalyutalara daha da təsir edəcək.