Honda çoxistifadəli raketini sınaqdan keçirib (VİDEO)

     Yaponiyanın Honda şirkəti çoxistifadəli daşıyıcı raketin uğurlu sınaq uçuşunu həyata keçirib. Belə sürətləndiricilərin hazırlanması dünyanın bir çox ölkəsində aparılır. Bu sahədə təşəbbüs ABŞ-ın aerokosmik şirkəti SpaceX-in və onun çoxistifadəli Falcon 9 raketinin uğurundan sonra genişlənib. Honda-nın daşıyıcı raketi Hokkaydo prefekturasında yerləşən Taiki Aerokosmik Tədqiqatlar Mərkəzində uçuş həyata keçirib. Sınaq zamanı raket təxminən 300 metr yüksəkliyə qalxıb, sonra isə eniş edib. Eniş zamanı Falcon 9-da istifadə olunanlara bənzər xüsusi dayaqlar açılıb. Şirkət bu raketdən istifadə etməklə ilk suborbital uçuşunu yaxın bir neçə il ərzində həyata keçirməyi planlaşdırır.

     Bu o deməkdir ki, daşıyıcı raket suborbital uçuşlar üçün nəzərdə tutulur - Jeff Bezos-un Blue Origin şirkətinə məxsus New Shepard raketi kimi, hansı ki, turist uçuşları çərçivəsində mütəmadi olaraq kosmos sərhədinə qədər qalxır. Mövcud məlumatlara əsasən, Honda-nın raketi 6.3 metr hündürlüyə malikdir və yanacaqla birlikdə 1.3 ton ağırlığındadır. Şirkət bildirir ki, daşıyıcı raket tamamilə şirkətin layihəsidir və bu sınaq raketin yalnız qalxmayıb, eyni zamanda uğurla eniş etdiyi ilk test olub. Əlavə məlumata görə, raket 271 metr hündürlüyə qalxıb və nəzərdə tutulan eniş nöqtəsindən cəmi 37 santimetr məsafədə yerə enib. Honda-nın açıqlamasına əsasən, uçuş 56 saniyə davam edib və raket enişdən sonra aşmadığı üçün missiya uğurlu hesab edilib.

     Yayımlanmış görüntülərdə görünür ki, Honda-nın raketi Falcon 9 sisteminə bənzər şəkildə açılan eniş dayaqlarından istifadə edir. Qeyd edək ki, Falcon 9 hazırda dünyada orbit sinfinə aid yeganə çoxistifadəli raketdir. Honda hələlik raketini kommersiyalaşdırmaq planları barədə məlumat verməyib. Yalnız 2029-cu ilə qədər suborbital məkana çatmaq niyyətində olduqları bəllidir. Hazırda Mitsubishi, IHI Corporation və Space One orbit sinfi daşıyıcı raketlərə malik yapon şirkətləridir. Lakin bu raketlərin hamısı bir dəfəlik istifadə üçün nəzərdə tutulur. Mitsubishi-nin Yaponiyanın Aerokosmik Tədqiqatlar Agentliyi (JAXA) ilə əməkdaşlıqla hazırladığı daşıyıcılar isə Yaponiyanın kosmik buraxılış proqramının əsasını təşkil edir.