Çinli insayderlərdən birinin vermiş olduğu məlumata əsasən Huawei şirkəti hal hazırda MatePad planşet seriyasının yeni modeli üzərində çalışır. Söhbət, MatePad Pro 13.2-dən gedir. Adından da bəlli olduğu kimi sözügedən planşet 13.2 düym ekranla təchiz olunmalıdır. Bunun olacağı halda MatePad Pro 13.2 planşeti MatePad seriyasının modelləri arasında ən böyük ekranı əldə edəcək.

    Məlumatda qeyd edilib ki, bu yeni planşetin daha bir fərqləndirici özəlliyi ondan ibarət olacaq ki, o, naqilsiz şarj texnologiyasının dəstəyinə sahib olacaq. İnsayder bildirib ki, MatePad Pro 13.2 planşeti 12 GB RAM, 256 GB daxili yaddaş həcmi və ikili arxa kamera ilə təchiz olunmalıdır. Planşetin Kirin prosessoru vasitəsilə çalışacağı istisna edilmir. Huawei MatePad 13.2 planşetinin nə zaman təqdim olunacağı barəsində isə hələ heç bir məlumat yoxdur.