Huawei FreeBuds Pro 3 naqilsiz qulaqlığı təqdim edilib - QİYMƏTİ

    Huawei şirkəti FreeBuds Pro 3 adlı yeni naqilsiz qulaqlığını təqdim edib. Bu yeni naqilsiz qulaqlıq ikili drayverləri və səs keyfiyyətinin yaxşılaşdırılmasına istiqamətlənmiş texnologiyaların dəstəklərini əldə edib. Bununla yanaşı FreeBuds Pro 3 bir dəfə şarj olunandan sonra daha uzun müddət ərzində çalışması ilə seçilir. Huawei FreeBuds Pro 3 özündə ətraf səs-küyün aktiv boğulması üçün nəzərdə tutulmuş Dynamic ANC 3.0 adlı funksiyanı birləşdirir. Üstəlik naqilsiz qulaqlıq Triple Adaptive EQ texnologiyasının dəstəyinə sahibdir.

    Bu texnologiya öz növbəsində səsi istifadəçinin qulaqlarının quruluşlarına uyğun optimizasiya edir. Telefon danışıqları üçün FreeBuds Pro 3-də PureVoice 2.0 adlı elektron səs boğma funksiyasından istifadə edilir. Bu funksiya telefon danışıqları zamanı fondakı səsləri boğmaq üçün nəzərdə tutulub. Şirkətin verdiyi məlumata əsasən qulaqlıqlar şarj keysi ilə birlikdə 31 saat ərzində çalışa bilirlər. Üstəlik FreeBuds Pro 3 eyni anda iki səs mənbəyinə qoşulma özəlliyinə sahibdir. Avropa bazarında bu yeni naqilsiz qulaqlıq 11 oktyabr tarixində satışa çıxacaq və 200 avro qiymətində satılacaq.