Huawei Watch GT4 flaqman smart saatı təqdim edilib - QİYMƏTİ

    Huawei şirkəti Watch GT4 adlı yeni flaqman smart saatını təqdim edib. Sözügedən smart saat iki gövdə ölçüsündə təqdim edilib. Onlardan biri 41 mm-lik, digəri isə 46 mm-lik gövdə ölçüsünə sahibdir. 41 mm-lik gövdə ölçüsünə sahib model 466x466 piksel keyfiyyətli 1.32 düym AMOLED ekran, 46 mm-lik gövdə ölçüsünə sahib model isə eyni keyfiyyətdə 1.43 düym AMOLED ekran ilə təchiz olunub. Hər iki modelin ekranı Always-on-Display funksiyasını dəstəkləyir. Bundan əlavə olaraq hər iki modelin gövdəsi paslanmaz poladdan hazırlanıb və 50 metr su dərinliyinə tab gətirə bilir. Sözügedən smart saat bədən temperaturunu ölçə, qandakı oksigen miqdarını təyin edə və ürək döyüntüləri ritmini ölçə bilir.

    Üstəlik Huawei Watch GT4 qadınlarda menstrual dövrlərin monitorinqini də reallaşdırmağa imkan verir. Huawei Watch GT4-də istifadəçi səhhətinin monitorinqi üçün nəzərdə tutulmuş TrueSeen 5.5+ adlı texnologiya reallaşdırılıb. Bu texnologiya deep learning əsaslı alqoritm vasitəsilə çalışır. Bunun sayəsində istifadəçi qan-damar göstəricilərinin ölçülməsi zamanı 30% daha dəqiq nəticələri əldə edir. Smart saatda reallaşdırılmış TrueSleep 3.0 texnologiyası isə yuxu keyfiyyətinin yaxşılaşdırılması üçün nəzərdə tutulmuş məsləhətləri təqdim edir. Huawei Watch GT4 özündə GPS-i, kontaktsız ödənişlər üçün NFC çipi və 100-dən çox idman rejimini birləşdirir. Huawei şirkətinin bu yeni smart saatının satışlarına 4 oktyabr tarixində start veriləcək və satış qiyməti 250 avrodan başlayacaq.