Intel 14-cü nəsil yeni prosessorlarını təqdim edib - QİYMƏTİ

     Intel şirkəti 14-cü nəsil Core i9-14900K, Core i7-14700K, Core i5-14600K prosessorlarını və onların iGPU-suz KF versiyalarını təqdim edib. Şirkət sözügedən prosessorların texniki özəlliklərini, performans göstəricilərini və satış qiymətlərini açıqlayıb. Intel-in sözlərinə əsasən AMD Ryzen 9 7950X3D-dən fərqli olaraq bu yeni prosessorlar kompüter oyunlarında 23%-lik performans artımı, professional tətbiqlərdə isə 10%-lik performans artımı sərgiləyirlər. Beləliklə ilk növbədə Core i9-14900K-dan başlayaq. Sözügedən prosessor 24 nüvəlidir. Onlardan 8-i yüksək performanslı, 16-sı isə enerji effektivliyi nüvələridir.

     Prosessor özündə 36 MB L3 keş yaddaşını və 32 MB L2 keş yaddaşını birləşdirir. Onun çalışma tezliyi isə 6 GHz-ə kimi təşkil edir. Prosessora Intel UHD 770 qrafikası inteqrasiya edilib. Core i9-14900K DDR-5600/DDR4-3200 (192 GB-a kimi) standartlı RAM yaddaşlarını dəstəkləyir və onun enerji sərfiyyatı 125-253 vatt təşkil edir. Sözügedən prosessor 589$-a, onun KF versiyası isə 564$-a satılır. İndi isə keçək Core i7-14700K prosessoruna. Bu prosessor 20 nüvəlidir. Onlardan 8-i yüksək performanslı, 12-si isə enerji effektivliyi nüvələridir.

     Prosessor özündə 33 MB L3 keş yaddaşını və 28 MB L2 keş yaddaşını birləşdirir. Onun çalışma tezliyi 5.6 GHz-ə kimi təşkil edir. Digər bütün göstəricilər baxımından Core i7-14700K prosessoru Core i9-14900K ilə eynidir. Core i7-14700K-nın qiyməti 409$, onun KF versiyasının qiyməti isə 384$ təşkil edir. Core i5-14600K prosessoruna gəldikdə isə o, 14 nüvəlidir. Onlardan 6-sı yüksək performanslı, 8-i isə enerji effektivliyi nüvələridir.

     Sözügedən prosessor özündə 24 MB L3 keş yaddaşını və 20 MB L2 keş yaddaşını birləşdirir. Prosessorun maksimal çalışma tezliyi isə 5.3 GHz təşkil edir. Core i5-14600K-nın maksimal enerji sərfiyyatı 181 vatt-dır. Digər bütün göstəricilər baxımından Core i5-14600K prosessoru daha öncəki iki prosessor ilə eynidir. Core i5-14600K 319$-a, onun KF versiyası isə 294$-a satılır. Sözügedən yeni prosessorlar ABŞ-da və bəzi digər ölkələrdə artıq satışa çıxıblar.