iPad 2018 modelinin dizaynı sızdırılmış məlumat sayəsində təsdiqləndi

    Bugün Apple şirkətinin iPad Pro modelinin dizaynında nəzərə çarpacaq dəyişiklik edəcəyi barəsində təkzib olunmaz sübut ortaya çıxıb. Yeni sızdırılmış məlumata əsasən şirkətin iPad Pro modeli ekran ətrafı çərçivələrdən və fiziki Home düyməsindən məhrum olacaq. Belə ki, iOS 12 əməliyyat sisteminin beta versiyasında sözügedən dəyişiklikləri özündə əks etdirən iPad modelinin ikonu aşkar edilib. Məhz bu üsulla keçən ilin İyul ayında HomePod cihazının sistem yenilənməsində iPhone X barəsində məlumat aşkar edilmişdi. Bundan əlavə olaraq məşhur analitik Ming-Chi Kuo da dəfələrlə yeni iPad modelinin eyni korpus ölçüsünü saxlayaraq böyük ekranla təchiz olunacağı barəsində məlumat verib. Bu cür dəyişiklik əslində heç də pis olmazdı. Belə ki, smartfon bazarında cihazların dizaynları sürətli şəkildə dəyişdiyi bir vaxtda həm Android həmdə iOS üzərində çalışan planşetlərin dizaynları son bir neçə il ərzində dəyişilməz olaraq qalır.