Lenovo şirkəti IFA 2023 sərgisində Legion Go adlı portativ oyun konsolu ilə yanaşı həmçinin Legion Glasses adlı VR eynəyini də təqdim edib. Şirkət bu yeni məhsulunu daşınıla bilən təkmilləşdirilmiş virtual monitor kimi qələmə verir. Lenovo Glasses USB Type-C girişinə sahib istənilən cihaza qoşula bilir. Lakin o daha çox Legion Go portativ oyun konsolundan istifadə üçün nəzərdə tutulub. Sözügedən VR eynək kameralara sahib deyil. Buna görə də o, AR imkanları təklif etmir.

    Bunun əvəzinə eynək iki ədəd micro-LED ekranla təchiz olunub. Hər bir ekran 60 Hz-lik təsvir yenilənməsini dəstəkləyir və Full HD keyfiyyətə sahibdir. Üstəlik eynəyin kənar hissələrində səsgücləndiricilər yerləşdirilib. Lenovo Legion-u Windows, macOS və Android vasitəsilə çalışan cihazlara qoşmaq mümkündür. Bunun üçün sadəcə olaraq cihazın USB Type-C girişinə sahib olması lazımdır. Lenovo Legion Glasses gələn ay 329$ qiymətində satışa çıxacaq.