Litium, batareyalarda istifadəsi ən optimal olan material deyil. Təbiətdə ona alternativ digər materiallar var. Buna misal olaraq kalsiumu gətirmək olar. Daha öncə alimlər kalsium tərkibli batareya daxilində effektiv şəkildə çalışa biləcək uyğun elektroliti tapa bilmirdilər. Lakin mütəxəssislər enerji həcmi baxımından litium-ion batareyaları geridə qoya bilən kalsium-metal batareyaları yarada biliblər. Kalsium litiumdan daha ucuz başa gəlir və özündə daha çox həcmdə enerji saxlaya bilir. Bununla yanaşı kalsium diffuziya prosesini və elektrolitlər ilə katod materiallarında ionların köçürülməsini sürətləndirə bilir.

    Mütəxəssislər bu üstünlüklərdən istifadə edərək mis sulfid və karbon kompoziti nanohissəciklərindən hazırlanmış katoda sahib kalsium əsaslı batareya yaradıblar. Nəzəri cəhətdən bu cür batareyanın hər qramına düşən enerji həcmi 560 mAh təşkil edir. Bu isə adi litium-ion batareyaların göstəricilərindən 100-200% yüksəkdir. Məsələn əgər Galaxy S23 smartfonu mis sulfid tərkibli kalsium-metal batareya ilə təchiz olunsaydı, nəzəri cəhətdən smartfonu enerji ilə 11700 mAh-lıq batareya təmin edə bilərdi. Mütəxəssislər tərəfindən test məqsədli hazırlanmış kalsium-metal batareya hətta 500 dövr şarj prosesindən sonra da stabil şəkildə çalışmağa davam edib və öz həcminin 92%-ni qoruyub saxlayıb. Bu cür batareyanın kommersiya məqsədli məhsullarda nə zaman istifadə ediləcəyi bilinmir.