MediaTek şirkəti Dimensity 8050 adlı yeni orta səviyyəli prosessorunu təqdim edib. Faktiki olaraq bu yeni prosessor daha öncə təqdim edilmiş Dimensity 1200 və Dimensity 1300-dən heç də fərqlənmir. Yeni Dimensity 8050 prosessoru TSMC şirkətinin 6 nanometrlik texnoloji prosesi əsasında hazırlanıb və özündə 5G modemi birləşdirir. Prosessor standart arxitekturaya sahibdir. Yəni o özündə 4 ədəd Cortex-A78 nüvəsini və 4 ədəd Cortex-A55 nüvəsini birləşdirir.

    Cortex-A78 nüvələrindən biri 3 GHz tezlikdə, digərləri isə 2.6 GHz tezlikdə çalışırlar. Cortex-A55 nüvələrinə gəldikdə isə onların hamısı 2 GHz tezlikdə çalışırlar. Dimensity 8050 prosessoru LPDDR4 standartlı 16 GB-a kimi olan RAM yaddaşlarını və UFS 3.1 standartlı daxili yaddaş həcmlərini dəstəkləyir. Prosessorda qrafik imkanlardan Mali-G77 qrafik çipi cavabdehdir. Bundan əlavə olaraq yeni prosessor 168 Hz-ə kimi olan təsvir yenilənməsinə sahib Full HD+ ekranları və 200 MP-lik kameraları dəstəkləyir. Sözügedən prosessoru ilk əldə etmiş smartfon Tecno Camon Premier 20 oldu.