Counterpoint Research şirkəti mobil prosessorlar bazarında şirkətlərin vəziyyətləri barəsində hesabatı təqdim edib. Söhbət, MediaTek, Qualcomm, Apple, Samsung, Unisoc və Huawei HiSilicon-dan gedir. Maraqlısı ondadır ki, MediaTek şirkəti mobil prosessorlar bazarında satışlar üzrə hələ də liderliyini qoruyub saxlayır. Samsung isə keçən ildən bu bazardakı payının 50%-ni itirib. Bu ilin birinci rübündə MediaTek şirkəti keçən ilin sonunda olduğu kimi mobil prosessorlar bazarında liderliyini qoruyub saxlayıb. Belə ki, şirkət bu bazarın 32% payına sahibdir. Qualcomm ilin əvvəlində 9%-lik yüsəliş sərgiləyərək bazarın 28% payını əldə edib.

    Apple isə bazar payının 2%-ni itirərək 26%-i ilə üçüncü yerdə qərarlaşıb. Unisoc ilə Samsung şirkətlərində də düşüşlər müşahidə edilib. Unisoc keçən ilin sonunda bazarın 11%-nə sahib idi. İndi isə bu göstərici 8% təşkil edir. Samsung-a gəldikdə onun bazar dəyəri hal hazırda 4% təşkil edir. Keçən il bu göstərici 8% təşkil edirdi. Nəticədə Samsung öz bazar payının 50%-ni itirib. Huawei HiSilicon 2021-ci ilin sonundan başlayaraq bazarın 1%-nə sahibdir. Lakin yaxın gələcəkdə şirkətin yeni mobil prosessorunun istifadəyə veriləcəyi barəsində xəbərlərin fonunda Huawei HiSilicon potensial olaraq bazardakı payını genişləndirə bilər.