MediaTek orta seqment smartfonlar üçün Dimensity 6100+ prosessorunu təqdim edib

    MediaTek şirkəti orta qiymət seqmentinə aid olan smartfonlar üçün nəzərdə tutulmuş yeni prosessorunu təqdim edib. Söhbət, Dimensity 6100+ prosessorundan gedir. Sözügedən yeni prosessor yaxşı performans və enerji effektivliyi balansına sahibdir. Bununla yanaşı Dimensity 6100+ prosessoru yüksək MP göstəricili kameraları və müasir mobil texnologiyaları dəstəkləyir. MediaTek-in bu yeni prosessoru 6 nanometrlik texnoloji proses əsasında hazırlanıb. Prosessorun arxitekturası özündə 2 ədəd Cortex-A76 nüvəsini və 6 ədəd Cortex-A55 nüvəsini birləşdirir.

    Bununla yanaşı prosessor 5G modemə də sahibdir. Şirkətin verdiyi məlumata əsasən MediaTek UltraSave 3.0+ adlı texnologiya prosessorun 5G şəbəkələrdə enerji sərfiyyatını aşağı salır. Bu isə öz növbəsində smartfonun bir dəfə şarj olunandan sonra daha uzun müddət ərzində çalışmasına imkan verir. Dimensity 6100+ prosessoru 120 Hz-ə kimi olan təsvir yenilənməsinə sahib ekranları, 108 MP-lik kameraları, saniyədə 30 kadr sürətlə 2K keyfiyyətli videoların çəkilişlərini və təsvirlərin emalı üçün nəzərdə tutulmuş süni zəka əsaslı müasir alqoritmləri dəstəkləyir. Dimensity 6100+ prosessoruna sahib ilk smartfonların bu ilin üçüncü rübündə təqdim olunacaqları gözlənilir.