Tayvanın prosessor istehsalçısı olan MediaTek avtomobillər və süni zəka əsaslı sistemlər üçün prosessorların istehsalına daha çox resurs sərf edəcək. Şirkət bu cür addım atmağa məcburdur. Belə ki, smartfon bazarında təklif edilən məhsul çeşidi artıq çox genişdir. Məişət əşyaları bazarında tələbat isə inflyasiya və digər neqativ makroiqtisadi faktorlar səbəbilə aşağı düşür.

    “Biz dəqiq şəkildə resurslarımızın böyük hissəsini avtomobil və hesablama texnologiyaları kimi sahələrə yönəldəcəyik. Belə ki, bu sahələr yaxın 3-5 il ərzində bizə böyüməyə kömək edəcəklər” - deyə MediaTek-in general direktoru Rick Tsai qeyd edib. O həmçinin bildirib ki, şirkət generativ süni zəka sahəsinə də ciddi investisiyalar yatıracaq. Belə ki, süni zəka sistemləri ilə çalışmaq üçün optimizasiya edilmiş prosessorlar həmçinin avtopilot sistemli nəqliyyat növlərinin hazırlanması üçün də lazımdır.