Microsoft şirkəti 21 sentyabr tarixində yeni təqdimat tədbiri keçirəcək. Baş tutacaq tədbirdə şirkətin yeni Surface cihazlarını təqdim edəcəyi gözlənilir. Onların arasında Surface Laptop Studio 2 mobil noutbuku da olmalıdır. İndi isə bu noutbukun fotoları və texniki göstəriciləri ortaya çıxıb. Beləliklə ortaya çıxmış məlumatlara əsasən Surface Laptop Studio 2 noutbuku 2021-ci ildə təqdim edilmiş orjinal Surface Laptop Studio-nun ekranını əldə edəcək. Yəni söhbət, 120 Hz-lik təsvir yenilənməsinə sahib 2400x1600 piksel keyfiyyətli 14.1 düym ekrandan gedir.

    Ekran olduğu kimi qalsa da texniki tərəf olduqca ciddi şəkildə yenilənəcək. Məlumata əsasən Surface Laptop Studio 2 noutbuku Intel-in 14 nüvəli prosessoru vasitəsilə çalışacaq. Bu ya Core i7-13700H ya da Core i7-13800H prosessoru olacaq. Bununla yanaşı noutbuk özündə ya GeForce RTX 4050 Laptop ya da GeForce RTX 4060 Laptop videokartını birləşdirəcək. Məlumatda qeyd edilib ki, Surface Laptop Studio 2-nin 64 GB RAM-a sahib versiyası da olacaq.