NASA “Artemis” missiyası çərçivəsində gələcək astronavtların Ay səthində tədqiqatları üçün nəzərdə tutulmuş yeni nəsil skafandrı təqdim edib. Skafandr Axiom Space adlı özəl şirkət tərəfindən hazırlanıb. Qeyd etmək lazımdır ki, sözügedən şirkət həmçinin gələcəkdə BKS-i (Beynəlxalq Kosmik Stansiya) əvəz edəcək yeni orbital stansiya üzərində də çalışır. Məlumatda qeyd edilib ki, hazırlanmış yeni nəsil skafandr son 40 il ərzində istifadə edilən daha əvvəlki skafandr modellərindən daha geniş hərəkət azadlığını təmin edir. Məsələn, astronavt sözügedən skafandr daxilində daha komfortlu şəkildə hərəkət edə, əyilə və diz üstə çökə bilər.

Bənzər xəbər

NASA agentliyi Ay missiyası üçün ekoloji superkompüteri təqdim edib

    Bununla yanaşı skafandra astronavtlara lazım olacaq müxtəlif növ alətlər də yerləşdirilib. Skafandrın dəbilqə hissəsinə yüksək keyfiyyətli kamera yerləşdirilib və həmin kamera təsviri birbaşa Yer kürəsinə ötürmək imkanına sahibdir. Dəbilqə hissə həmçinin bir neçə ədəd fənərə də sahibdir. Skafandrın arxa hissəsində astronavtın həyat dəstəyi üçün nəzərdə tutulmuş bel çantası mövcuddur. Mühəndislərin sözlərinə əsasən sözügedən skafandr astronavtın ekstremal soyuq temperaturdan qorunmasını təmin edir. Skafandrın xarici görünüşü üzərində Apple TV+ servisinin fantastik janrda serialı olan “For All Mankind”-ın kostyum dizayneri çalışıb.

    Qeyd etmək lazımdır ki, skafandrın qara rəngli versiyası sadəcə effektli təqdimat üçün sərgilənib. Reallıqda isə astronavtlar skafandrın ağ rəngli versiyasından istifadə edəcəklər. Ağ rəngli versiya öz növbəsində astronavtları yüksək temperatur göstəricilərindən qoruyacaq. Yeni nəsil skafandrdan “Artemis III” missiyası çərçivəsində istifadə ediləcək. Plana əsasən bu missiya 2025-ci ildə reallaşdırılacaq və onun çərçivəsində astronavtlar Ay səthinə ayaq basacaqlar.