NVIDIA GeForce RTX 4060 Ti videokartı təqdim edilib - QİYMƏTİ

    NVIDIA şirkəti GeForce RTX 4060 ilə yanaşı həmçinin RTX 4060 Ti videokartını da təqdim edib. Bu videokart iki versiyada təqdim edilib. Onlardan biri 8 GB VRAM, digəri isə 16 GB VRAM ilə təchiz olunub. RAM hər iki versiyada GDDR6 standartlıdır. RTX 4060 Ti məlumatların saniyədə 288 GB sürətlə ötürülməsini mümkün edir. Videokart özündə TSMC şirkətinin yaxşılaşdırılmış 5 nanometrlik texnoloji prosesi əsasında hazırlanmış AD106-350/351 qrafik prosessorunu birləşdirir.

    GPU 2.54 GHz tezlikdə çalışan 4352 ədəd CUDA nüvəsinə sahibdir. Onun enerji sərfiyyatı isə 160 vatt təşkil edir. Adi RTX 4060-da olduğu kimi RTX 4060 Ti-da da DLSS 3 texnologiyasının dəstəyi var. Bunun hesabına yeni videokart RTX 3060 Ti ilə müqayisədə 70% daha yüksək performans sərgiləyir. RTX 4060 Ti videokartının hər iki versiyası iyul ayında satışa çıxacaq. 8 GB VRAM-a sahib versiya 400$-a, 16 GB VRAM-a sahib versiya isə 500$-a satılacaq.