OnePlus şirkətinin hal hazırda üzərində çalışdığı yeni məhsullardan biri də OnePlus Buds Pro 3 adlı naqilsiz qulaqlıqdır. OnLeaks ləqəbli məşhur insayder öz növbəsində sözügedən yeni naqilsiz qulaqlığın fotolarını və bəzi texniki imkanlarını təqdim edib. Beləliklə fotolardan da görmək olar ki, yeni naqilsiz qulaqlıq xarici görünüşcə hal hazırda aktual olan OnePlus Buds Pro 2-dən heç də fərqlənməyəcək.

    Qulaqlıqların özləri IP55 standartı üzrə, şarj keysi isə IPX4 standartı üzrə sudan qorunacaqlar. Bundan əlavə olaraq OnePlus Buds Pro 3 ətraf səs-küyün aktiv boğulması funksiyasını əldə edəcək. Bu funksiya sayəsində qulaqlıqlar ətraf səs-küyü 48 dB-ə (desibel) kimi boğa biləcəklər. Yeni naqilsiz qulaqlıq Bluetooth 5.3 dəstəyinə sahib olacaq və şarj keysi ilə birlikdə 22 saat ərzində çalışa biləcək. OnePlus Buds Pro 3-ün yanvar ayında OnePlus 12 ilə birlikdə təqdim olunacağı gözlənilir.