Redmi Pad SE planşetinin render fotoları təqdim edilib

    Artıq dəfələrlə məlumat ortaya çıxıb ki, Xiaomi-nin Redmi brendi hal hazırda Redmi Pad 2 planşeti üzərində çalışır. Ortaya çıxmış yeni məlumata əsasən isə sözügedən planşet bazarda tamamilə fərqli ad ilə satışa çıxacaq. İnsayderlər bildiriblər ki, Redmi-nin yeni planşeti bazarda Redmi Pad SE adı altında satılacaq. Bununla yanaşı insayderlər Redmi Pad SE-nin keyfiyyətli render fotolarını da təqdim ediblər.

    Render fotolardan da görmək olar ki, planşet 3 gövdə rəngində satışa çıxacaq. Yaşıl, bənövşəyi və tünd-boz. Bununla yanaşı planşet özündə USB Type-C girişini və naqilli qulaqlıqlar üçün nəzərdə tutulmuş 3.5 mm-lik audiogirişi birləşdirəcək. Texniki göstəricilərə gəldikdə isə planşetin 90 Hz-lik təsvir yenilənməsinə sahib 11 düym LCD ekran, Snapdragon 680 prosessoru, 8 MP-lik arxa kamera və 5 MP-lik ön kamera ilə təchiz olunacağı gözlənilir. Redmi Pad SE-nin 1 sentyabr tarixində Xiaomi 13T smartfon seriyası ilə birgə təqdim olunacağı güman edilir.