Samsung Exynos 2400 prosessoru barəsində rəsmi məlumatlar verilib

    System LSI Tech Day 2023 tədbiri çərçivəsində Samsung şirkəti öz yeni flaqman prosessoru barəsində yeni məlumatları təqdim edib. Söhbət, Exynos 2400-dan gedir. Məlumata əsasən sözügedən prosessor AMD şirkətinin RDNA 3 arxitekturası əsasında hazırlanmış Xclipse 940 adlı qrafik çipinə sahibdir. Samsung təmsilçilərinin sözlərinə əsasən Exynos 2400-ın mərkəzi prosessorunun performansı 1.7 dəfə, süni zəka sisteminin performansı isə 14.7 dəfə yüksəlib.

  Nəticədə Exynos 2200 ilə müqayisədə Exynos 2400 prosessoru 70% daha sürətlə çalışır. Lakin burda əsas nüans ondan ibarətdir ki, şirkət Exynos 2400 modelini məhz Exynos 2200 ilə müqayisə edir. Dünən isə Exynos 2400-ın ilk GPU test nəticələri ortaya çıxdı və onlar heç də ürəkaçan deyillər. Belə ki, Exynos 2400-ın GPU-su Snapdragon 8 Gen 3-də istifadə ediləcək GPU-dan daha geridə qalır. Bu isə o deməkdir ki, gələn il Exynos 2400 prosessoruna sahib olacaq smartfonlar qrafik mövzuda Snapdragon 8 Gen 3 prosessoruna sahib olacaq smartfonlardan geridə qalacaqlar.