Samsung Galaxy Tab S9+ planşetinin hansı prosessora sahib olacağı məlum olub

    Hələ təqdim edilməmiş Galaxy Tab S9 planşet seriyasına daxil olacaq Galaxy Tab S9+ modeli Geekbench-in məlumatlar bazasında ortaya çıxıb. Sözügedən planşet SM-X816B model nömrəsinə sahibdir. Geekbench-dəki məlumatlara əsasən Galaxy Tab S9+ planşeti Snapdragon 8 Gen 2 prosessoru vasitəsilə çalışır. Qeyd etmək lazımdır ki, Geekbench testlərindən bu planşetin 12 GB RAM-a sahib versiyası keçib.

    Beləliklə planşet Geekbench-in bir nüvəli testi çərçivəsində 1974 xal, çox nüvəli testi çərçivəsində isə 5194 xal toplayıb. Planşet Android 13 əməliyyat sistemi vasitəsilə çalışır. Son məlumat sızıntılarına əsasən Galaxy Tab S9+ planşeti 120 Hz-lik təsvir yenilənməsinə sahib OLED ekran və IP67 standartı üzrə sudan və tozdan qorunan gövdə ilə təchiz olunacaq. Galaxy Tab S9 planşet seriyasının avqust ayında təqdim olunacağı gözlənilir.