Səudiyyə Ərəbistan insanlardan çox robotların yaşayacağı futuristik şəhəri tikmək üçün 500 milyard dollar vəsait ayıracaq

Şəhər tamamilə bərpa olunan enerji mənbələri hesabına enerji ilə təmin olunacaq və qazıntı yanacağının istifadə olunmayacağı ən böyük yaşayış yeri olacaq. Bununla yanaşı NEOM sakinlərinin böyük bir hissəsini insanlar deyil, robotlar təşkil edəcək. Bu şəhərin Misir ilə İordaniya sərhədində olan Qırmızı dəniz sahilində tikilməsi planlaşdırılır. Bu plan haqqında Səudiyyə Ərəbistabnın varis şahzadəsi Mohammad bin Salman bin Abdulaziz Al Saud, Future Investment Initiative tədbirində danışıb. NEOM sayəsində ərəb ölkəsi öz iqtisadiyyatını dəyişməyi və ilk növbədə neft daxil olmaqla təbiət resurslarından az səviyyədə asılı olmağı planlaşdırır.

Nyu York-un sahəsindən 33 dəfə böyük olacaq NEOM futuristik şəhəri öz enerjisini günəş və külək qurğuları sayəsində əldə edəcək. Əgər bu layihə reallaşsa, onda NEOM bərpa olunan enerji ilə təmin olunacaq ən böyük şəhər olacaq. Sözügedən şəhərin tikilməsi üçün Səudiyyə Ərəbistan höküməti özəl investorlarla birlikdə 500 milyard dollar vəsait ayıracaq. Bu vəsaitin bir hissəsini ölkə, “Saudi Aramco” adlı böyük neft şirkətinin 5%-nin satılmasından əldə etməyi planlaşdırır. Bununla yanaşı gələcəyin şəhərinə həmçinin “SoftBank”ın CEO-su Masayoshi Son da investisiya yatıracağına söz verib.

Arab News-un verdiyi məlumatlara əsasən NEOM-dakı əsas investisiya sektorları siyahısında qida sənayesi, biotexnologiyalar, innovasiyalı sənaye istehsalı, rəqəmsal elmlər, energetika və su resurslarının istifadəsi, həmçinin insan resursları və əyləncə olacaq. NEOM-da nəqliyyat tamamilə avtonom rejimdə çalışacaq və bir çox xidmətləri məhz robotlar təqdim edəcəklər. Güman olunur ki, şəhərdə insanlardan çox robotlar olacaq. Şəhər sakinlərinə tamamilə pulsuz şəkildə dünya səviyyəsində təhsilin və bütün elektron dövlət xidmətlərinin təqdim olunacağına söz verilib.

Layihənin planı hələki tərtib olunmasa da onun ilk mərhələsinin 2025-ci ildə tikilib başa çatdırılması planlaşdırılır. NEOM-un rəhbəri isə Klaus Kleinfeld olacaq. Daha öncə Klaus, “Alcoa” adlı metallurgiya şirkətinin rəhbəri olmuşdur.