Logo
    main-post-cover

    Səudiyyə Ərəbistanı dünyanın ən böyük hidrogen istehsalı zavodunu inşa edəcək

         Səudiyyə Ərəbistanı Qırmızı dəniz sahilində yerləşən Yanbu sənaye mərkəzində dünyanın ən böyük ekoloji təmiz hidrogen istehsalı zavodlarından birini tikməyi planlaşdırdığını bəyan edib. Bu layihə, artıq inşası davam edən və gücü 2.2 GVt olan Neom kompleksindən təxminən 2 dəfə böyük olacaq. O, ildə 400 000 tonyaşılhidrogen istehsalını hədəfləyir. İstehsal olunacaq yanacaq ammonyaka çevriləcək və dünyaya ixrac ediləcək ki, bu da karbonsuz enerjiyə artan qlobal tələbatı dəstəkləmək məqsədi daşıyır. Layihənin təşəbbüskarı Səudiyyə Ərəbistanının enerji sektorundakı əsas oyunçulardan biri olan ACWA Power şirkətidir. Layihə Almaniyanın enerji nəhəngi EnBW ilə əməkdaşlıq çərçivəsində həyata keçiriləcək.
         ACWA Power-ın açıqlamasına görə, zavod ümumi gücü 4 GVt olan elektroliz qurğuları ilə təchiz olunacaq. Bu isə hidrogen istehsalını elə bir miqyasda artırmağa imkan verəcək ki, Səudiyyə Ərəbistanının 2030-cu ilə qədər dünya hidrogen ixracının 10%-ni təmin etmək kimi iddialı hədəfinə ciddi töhfə verilmiş olacaq. Müqayisə üçün qeyd edək ki, əvvəllər dünyanın ən böyük hidrogen zavodu adlandırılan Neom layihəsi 2.2 GVt gücə və ildə 240 000 ton hidrogen istehsalına hesablanıb. İnfrastrukturun əsas elementi yaşıl ammonyak ixracı üçün xüsusi terminal, həmçinin elektroliz prosesi üçün zəruri olan suyun duzsuzlaşdırılması sistemi olacaq.
         Zavodun fəaliyyəti üçün enerji bərpa olunan mənbələrdən - paralel olaraq tikilməsi planlaşdırılan genişmiqyaslı günəş və külək elektrik stansiyalarından təmin olunacaq. Hərçənd bu stansiyaların inşası hələ ki, zavodun layihələndirilməsi müqaviləsinə daxil deyil, onların mövcudluğu layihənin “yaşıl” hidrogen kriteriyalarına cavab verməsi baxımından həlledici əhəmiyyət daşıyır. Yanbu mərkəzinin istifadəyə verilməsi daha geniş regional kontekstə uyğundur: Yaxın Şərq və Şimali Afrika ölkələri dünya hidrogen bazarında aparıcı mövqe tutmağa çalışırlar.
         Birləşmiş Ərəb Əmirlikləri öz hidrogen strategiyasının həyata keçirilməsi üçün 10 milyard avrodan çox vəsait ayırıb, Mərakeş isə Avropaya tədarük imkanı verəcək güclərin inkişafına 32 milyard dollar investisiya qoymağı planlaşdırır. Ümumilikdə, regionun layihələri hazırda dünyada inkişaf mərhələsində olan bütün elektroliz güclərinin təxminən 10%-ni əhatə edir. Bəyan edilmiş investisiyaların təsiredici miqyasına baxmayaraq, ekspertlər vurğulayırlar ki, bu kimi bir çox layihələr hələ də yekun investisiya qərarlarını gözləyir. Bununla belə, aparıcı enerji korporasiyaları və dövlətlərin artan marağı təsdiqləyir ki, Fars körfəzi regionu qlobal hidrogen bazarının əsas mərkəzlərindən birinə çevrilməkdədir.
    Paylaş