SK Hynix süni intellekt üçün 100-dən çox prosessorlu SSD çipi hazırlayır

    “SK Hynix” süni intellekt sistemlərində artan məlumat axınını idarə etmək üçün yeni SSD kontrollerləri hazırlayır. Bu çiplər yaddaşa məlumat yazılması və oradan məlumat oxunması prosesini idarə edir. Şirkət hər kontrollerə 100-dən çox kompakt prosessor yerləşdirməyi planlaşdırır. “H-TPU” adlı bu kiçik prosessorlar təkrarlanan yaddaş əməliyyatlarını əsas CPU-nun üzərindən götürəcək.

    Hazırkı SSD kontrollerlərində CPU nüvələri məlumatın oxunması və yazılması ilə yanaşı, əlavə qeydlərin yenilənməsini və müvəqqəti yaddaşın idarəsini də yerinə yetirir. Daha sürətli bağlantılar əlavə CPU nüvələri tələb etdiyindən çip böyüyür və daha çox enerji sərf edir. Hər “H-TPU” adi CPU nüvəsinin tutduğu sahənin cəmi 4%-ni tutur, enerji sərfi də onun təxminən 2,5%-i qədərdir.

    “H-TPU” əməliyyatları 4 mərhələdə emal edir və ardıcıl tapşırıqlar üçün hazırlanıb. Kontroller sorğuya uyğun vahidləri işə salır, lazım olmayanları gözləmə rejiminə keçirir. Xətaların düzəldilməsi, istisna halların idarəsi və yaddaş qaydaları kimi mürəkkəb işlər yenə adi CPU nüvələrində qalır. Kiçik prosessorlar isə gündəlik və təkrarlanan əməliyyatları yerinə yetirir.

    “SK Hynix” “H-TPU” vahidlərini növbəti nəsil müəssisə SSD kontrollerlərinə və “Storage Next” arxitekturasına əlavə etməyi düşünür. Texnologiyanın yüksək sürətlə məlumat ötürən HBF fləş yaddaşı ilə də işləməsi planlaşdırılır. Gələn il bazara çıxacağı gözlənilən HBF ağır süni intellekt tapşırıqları üçün hazırlanır.

    “Storage Next” yeni süni intellekt modellərinin yaratdığı daha kiçik məlumat sorğularını emal edəcək. Sistem 512 baytlıq və daha kiçik əməliyyatları dəstəkləyəcək. Bu, standart 4 KB məlumat vahidinin 1/8-i deməkdir. Arxitektura PCIe 6.0, PCIe 7.0 və PCIe 8.0 bağlantıları ilə işləyəcək. Ondan “AIN P”, “AIN B” və “AIN D” məhsullarında da istifadə olunacaq. Kommersiya məhsullarının nə vaxt çıxacağı və texnologiyanın SSD-lərin ümumi sürətinə necə təsir edəcəyi hələ açıqlanmayıb.